Bələdiyyə sədri üç il iş aldı

Bələdiyyə seçkiləri ərəfəsində qanunsuz olaraq torpaq satmaqda ittiham olunan bələdiyyə sədrinə həbs cəzası verildi. Dünən Ağır Cinayətlərə Dair İşlər üzrə Məhkəmədə hakim Ələkbər Quliyevin sədrliyi ilə Binəqədi rayonundakı Xocasən bələdiyyəsinin sədri Zəfər Məsimova hökm oxunub. Məhkəmədən "Turan"a verilən məlumata görə, bələdiyyə sədri CM-nin mənimsəmə və ya israfetmə (179), vəzifə səlahiyyətlərini aşma (309), rüşvət alma (311) və səhlənkarlıq (314) maddələri ilə ittiham olunaraq, 3 il azadlıqdan məhrum edilib.

Məsimov 2007-ci ildə Binəqədi rayonunda dövlət mülkiyyətinə məxsus 400 kv.metrlik torpaq sahəsini qanunsuz olaraq Xanlar Dadaşovun istifadəsinə verməkdə təqsirli bilinib. Məsimovun işi üzrə istintaq Baş Prokuror yanında Korrupsiyaya Qarşı Mübarizə İdarəsində aparılıb.

Xatırladaq ki, 2008-ci ildə 15 bələdiyyə ilə bağlı materiallar prokurorluq orqanlarına təqdim edilib. Bələdiyyələr tərəfindən qanunsuz ayrıldığı müəyyən edilən 6 min hektardan çox torpaq sahəsinin geri qaytarılması təmin olunub.

Qeyd edək ki, Z.Məsimov yalnız qanunsuz olaraq torpaq satmaqda deyil, həm də 15 min manat bələdiyyə vəsaitini mənimsəməkdə ittiham olunurdu.

Belə ki, son 10-15 ildə azı 100 dəfə böyüyən Xocasən qəsəbəsi əsasən Neft Şirkətinin Binəqədi rayonundakı 4-cü mədən sahəsi ərazisində salınıb. Əslində Neft Şirkətinə məxsus olan torpaqlar ya həqiqi, ya da saxta sənədlərlə Xocasən bələdiyyəsi tərəfindən sakinlərə satılıb. Uzun illər davam edən bu alğı-satqının əsas ziyanını da bu ərazilərdə ev tikən insanlar görüblər. Dəfələrlə Neft Şirkətinin əməkdaşları və digər aidiyyəti icra hakimiyyəti orqanları da qanunsuz olaraq, yəni hər hansı bir məhkəmə qərarı və ya kompensasiya verilmədən əhalinin evlərini və daş hasarlarını uçurublar. Həmin proses bu gün də davam edir.