Rusiya XİN informasiya və mətbuat departamentinin direktoru Andrey Nesterenko Ermənistanın xarici işlər naziri Edvard Nalbandyanın fikirlərinə cavab verib. APA-nın məlumatına görə, cavabda bildirilir ki, bəzi Ermənistan kütləvi informasiya vasitələrinin Rusiya Xarici İşlər Nazirliyinin rəsmi təmsilçisinin noyabrın 17-də söylədiyi fikirlər ətrafında hay-küy qaldırması Moskvanın diqqətindən qaçmayıb.
"Ermənistan mətbuatında bildirilir ki, guya Moskva mövqeyini dəyişib və indi Dağlıq Qarabağ münaqişəsinin nizamlanması və Türkiyə-Ermənistan yaxınlaşması proseslərini bir-biri ilə əlaqələndirir. Bu, anlaşılmazlıqdır. Rusiyanın bununla bağlı mövqeyi dəfələrlə xarici işlər naziri Sergey Lavrov tərəfindən açıqlanıb. Bu mövqe dəyişməz qalır. Söhbət iki fərqli prosesdən gedir".
Andrey Nesterenko bildirib ki, Rusiya Ermənistanla Türkiyə arasında imzalanmış sənədləri pozitiv dəyərləndirir: "Əminik ki, Ermənistanla Türkiyə arasında mehriban qonşuluq əlaqələrinin qurulması Cənubi Qafqazda sülh və təhlükəsizliyin daha da möhkəmlənməsinə obyektiv təsir göstərəcək. Dağlıq Qarabağ münaqişəsinə gəldikdə isə, mövcud fikir ayrılıqlarına baxmayaraq, tərəflər nizamlanma prosesinin baza prinsiplərinin razılaşdırılması istiqamətində müəyyən irəliləyişə nail olublar. Bizim öz rolumuzu prosesin inkişafına təsir etmək, tərəflərin ortaq məxrəcə gəlməsinə yardım göstərmək şəklində görürük, lakin münaqişə tərəflərinə zorla heç bir həll resepti təlqin etmirik. Bu zaman mövqeyimiz ona əsaslanır ki, son seçim azərbaycanlılar və ermənilərin öhdəsinə düşür. Rusiya bütün tərəfləri razı salacaq istənilən həll variantını dəstəkləməyə, kompromis razılıq əldə edəcəyi təqdirdə nizamlanmanın qarantı rolunda çıxış etməyə hazırdır".
|
