ATƏT Minsk Qrupu həmsədr ölkələrinin dəvəti ilə Azərbaycan və Ermənistan prezidentləri İlham Əliyev və Serj Sarqsyan noyabrın 22-də Fransanın Münhendəki baş konsulunun iqamətgahında bu il ərzində altıncı dəfə bir araya gələcəklər. APA-nın "RİA Novosti"yə istinadən verdiyi xəbərə görə, bu barədə Fransa XİN sözçüsü Bernar Valero Parisdə keçirdiyi mətbuat konfransında rəsmi açıqlama verib.
Sözçü 2007-ci ilin noyabrında Madriddə Fransa və Rusiya xarici işlər nazirləri və ABŞ dövlət katibinin tərəflərə münaqişənin ədalətli, uzunmüddətli və dinc yolla həllinin əsas prinsiplərini təqdim etdiklərini bildirib. Açıqlamada "Böyük səkkizlər"in Akvil şəhərində keçirilən sammiti zamanı da həmsədr ölkə rəhbərlərinin birgə bəyanatla çıxış etdikləri və tərəfləri Madrid prinsiplərinin razılaşdırılmasını başa çatdırmağa çağırdıqları xatırladılıb.
Prezidentlərin növbəti görüşünün də nəticəsiz bitəcəyini vəd edən yerli analitiklərin fikrincə, Ermənistana hazırkı vəziyyət tam sərfəlidir və rəsmi Yerevan, sadəcə, sülhpərvər olduğunu nümayiş etdirmək üçün bu kimi görüşlərdə iştirak edir, amma qeyri-konstruktivliyi, sadəcə, vaxt uzadır.
"Ermənistan-Azərbaycan münaqişəsi təxirə salınmış, dondurulmuş vəziyyətdədir və gələcəkdə real sülh perspektivi görünmür. Münaqişənin hərbi perspektivi də yoxdur, çünki müharibədən heç nə alınmayacaq". Bunu isə APA-nın Moskva müxbirinə rusiyalı politoloq, Ali İqtisadiyyat Məktəbinin tətbiqi politologiya fakültəsinin dekanı, siyasi elmlər doktoru Mark Urnov verib. Politoloq iddia edib ki, Dağlıq Qarabağ mövcud durumda kifayət qədər hərbi potensiala malikdir və hətta Ermənistan dəstəyini çəksə belə, mövcud statusunu qorumağa qadirdir: "Buna görə də regionun indiki statusu çox çəkəcək, xüsusilə nəzərə almaq lazımdır ki, artıq Ermənistanla Türkiyənin aktiv yaxınlaşması başlayır. Azərbaycan bu mənada münaqişə məsələsində öz müttəfiqinin yüz faizli dəstəyini itirmiş olur, Dağlıq Qarabağ və Ermənistanın isə mövqeləri möhkəmlənir. Çünki onları ənənəvi olaraq İran müdafiə edirdi, indi isə Türkiyə tərəfdən loyal münasibətlə üzləşəcəklər".
Politoloq hər iki tərəfi təmin edəcək həll perspektivlərinin olmadığını deyib: "Azərbaycan Dağlıq Qarabağı öz yurisdiksiyasına qaytarmaq istəyir, nə Dağlıq Qarabağ, nə də Ermənistan bununla birmənalı razılaşmayacaq. Ona görə də gərginlik davam edəcək. Bu prosesin nə vaxta qədər davam edəcəyini heç kəs deyə bilməz, lakin düşünürəm ki, həm Rusiya, həm də Qərb ölkələri Azərbaycanı münaqişənin hərbi yolla həlli variantından çəkindirməyə çalışacaqlar".
|
