Rafet El Roman yenidən Bakının qonağı olacaq. Paytaxtda sıx konsert proqramları ilə çıxış edən türkiyəli sənətçinin növbəti çıxışı bu ayın sonuna təsadüf edəcək. Konsert istirahət mərkəzlərinin birində olacaq. Konsertin təşkilatçısı Nahid Emiloğlunun məlumatına görə, Rafet El Roman repertuarını əsasən klassik Azərbaycan mahnıları üzərində qurub. Hər gəlişində klassik mahnılarımızdan birini öyrənərək onu özü ilə Türkiyəyə aparan sənətçi artıq bunları mənimsəyib. Yəni həmin mahnıları əvvəlcə çantasında ölkəsinə daşıyıb, daha sonra beyninə həkk edərək buraya gətirib. Budəfəki konsertində onlardan bir neçəsini oxumağı düşünür.
Öyrəndik ki, mahnılar Azərbaycan milli musiqi alətlərinin müşayiəti ilə təqdim ediləcək. Onu tarda Humay Qədimova, kamançada isə Sevinc Bağıyeva müşayiət edəcəklər. Öyrəndik ki, repertuarda yer alan mahnılar sırasında Tofiq Quliyevin bəstələri geniş yer alıb. Eyni zamanda, özünün bir neçə mahnısını da bizim alətlərin müşayiəti ilə səsləndirməyi düşünür.
|
