Bu gün Bakıda şotlandlar özlərinin Müqəddəs Endryu gününü qeyd edəcəklər. Bakı Kaledoniya Cəmiyyətinin təşkil etdiyi bayram tədbirlərinin bir hissəsi kimi Şotlandiya milli musiqi ifaçıları olan tuluq zurnaçıları qrupu şənbə günü, günorta saatlarında İçərişəhərdə çıxış edəcək və parad keçirəcəklər. Tuluq zurnaçıları öz ifalarına Qoşa Qala Qapısı qarşısındakı əsas meydanda başlayacaq və daha sonra Endryu gününün mədəniyyətlərarası xarakterini təcəssüm etdirmək üçün İçərişəhərin qədim küçələrindən keçəcəklər. Musiqiçilərin nümayişi İçərişəhərin əsas küçələrində təxminən bir saat davam edəcək və Qız Qalasının yanında yekunlaşacaq.
"İçərişəhər" Dövlət Tarix-Memarlıq Qoruğu İdarəsinin rəisi Mikayıl Cabbarov bu cür tədbirlərin təşkilini dəstəkləməkdə məqsədin İçərişəhərin beynəlxalq aləmdə təbliğini daha da genişləndirməkdən ibarət olduğunu bildirdi: "Biz şotlandların qədim musiqi alətini şəhərimizdə dinləməkdən çox şadıq. Qeyd etməliyəm ki, bu nümayiş mədəniyyətlərarası dialoqun inkişafına xidmət edən ilk belə tədbirdir və gələcəkdə tərəfimizdən bu kimi yeni təşəbbüslər planlaşdırılır".
|
