Beynəlxalq təşkilatlardan ölkəmizin ünvanına kəskin ittihamlar yağış kimi yağır. Məsələn, "Amnesty İnternational" beynəlxalq hüquq-müdafiə təşkilatı Azərbaycanda həbs cəzasına məhkum edilmiş gənc bloggerlər Emin Milli və Adnan Hacızadəni "vicdan məhbusları" elan edib. "Turan"ın məlumatına görə, təşkilatın Avropa və Mərkəzi Asiya proqramının direktoru Nikola Dukvors deyib ki, iki fəala qarşı ittihamlar saxta olub. Təşkilat bu hökmü ifadə azadlığının boğulması və hökumətə qarşı tənqidlərə cavab kimi qiymətləndirir.
"Amnesty İnternational" Azərbaycan hökumətini gəncləri dərhal və şərtsiz həbsdən azad etməyə çağırır. Bu zaman təşkilat bloqçuların işinin obyektiv araşdırılmadığını qeyd edir.
E.Milli və A.Hacızadə noyabrın 11-də Səbail rayon məhkəməsinin qərarı ilə xuliqanlıq ittihamı ilə müvafiq olaraq 2,5 və 2 il həbs cəzasına məhkum ediliblər. Lakin yerli və beynəlxalq ictimaiyyət əmindir ki, gənclər internetdə nümayiş etdirdikləri fərqli düşüncələrinə görə təqib olunurlar.
Gənclərin həbsinə sərt mesajlardan biri də Avropa Şurasından gəlib. "Böyük zaman kəsimindən bizim işimizə nəzər salsan, həqiqətən də görərsən ki, Avropa Şurasının vəziyyəti dərhal dəyişmək, ona təsir etmək gücündə olan mexanizmləri yoxdur. Amma biz inanırıq ki, həm ümumilikdə, həm də, misal üçün, elə bloggerlərin işində Azərbaycanın Avropa Şurasındakı üzvlüyünün böyük zaman kəsimində faydası olacaq. Biz gərək səbirlə Azərbaycana təsir etməyə davam edək və inanırıq ki, Azərbaycanın Avropa Şurasında olması bu ölkədəki müsbət proseslərin inkişafına kömək edəcək". Bunu Avropa Şurasının baş katibi Torbyorn Yaqland "Azadlıq" radiosu və "Turan" informasiya agentliyinə müsahibəsində deyir.
"Əgər vəziyyət əks tərəfə inkişaf edərsə, təbii ki, ölkənin bu qurumdakı üzvlük məsələsi gündəliyə gətiriləcək, çünki Avropa Şurasında ancaq bu qurumun standartlarına və dəyərlərinə uyğun dövlətlər üzv ola bilər", - deyə baş katib qeyd edib.
Belə ki, Avropa Birliyi prezidentliyi də gənclərin həbsi ilə bağlı bəyanatla çıxış edib. Bəyanatda bu hökmdən narahatlıq ifadə olunub. "Turan" agentliyinə daxil olmuş bəyanatın mətnində deyilir: "Prezidentlik təəssüf edir ki, məhkəmə prosesi obyektiv olmayıb və hesab edir ki, bu qərar gələcəkdə Azərbaycanda ifadə azadlığını sarsıda bilər".
"Prezidentlik xatırladır ki, Azərbaycan ATƏT-ə və Avropa Şurasına daxil olarkən, habelə Avropa Birliyi ilə münasibət qurarkən demokratiyaya, ədalətli idarəetməyə, qanunun aliliyinə və insan hüquqlarına sadiq olduğunu bəyan edib. Prezidentlik təsdiq edir ki, "Şərq tərəfdaşlığı" proqramı çərçivəsində Azərbaycanın demokratik institutlarının inkişafında ona yardım etmək istəyir və buna hazırdır".
Habelə mərkəzi ofisləri ABŞ-da yerləşən "Human Rights Watch" və "Freedom House" beynəlxalq hüquq müdafiə təşkilatları bloggerlərin həbsi ilə bağlı Azərbaycan hakimiyyətini tənqid edən kəskin bəyanatla çıxış ediblər.
"Bu, ifadə azadlığı məsələsində geriyə doğru addımdır və ifadə azadlığına qarşı düşmənçiliyin güclənməsinə dəlalət edir", - deyə "Human Rights Watch"un bəyanatında bildirilir. "Ölkə hakimiyyəti müxalif jurnalistləri cəzalandırmaq üçün saxta ittihamlardan istifadə edirdi və bu halda da gənclərin həbsi üçün eyni metoda əl atılıb", - təşkilatın Cənubi Qafqaz üzrə nümayəndəsi Giorgi Qodia belə hesab edir.
"Freedom House"un bəyanatında deyilir ki, bloggerlərin həbsi Azərbaycanda yeni media növlərinin fəaliyyətinə ciddi zərbə oldu. Beləliklə, hakimiyyət ifadə azadlığının vəziyyəti haqqında çox pis ismarıc göndərdi və hesab edir ki, əməlləri cəzasız qalacaq", - təşkilatın icraçı direktoru Cenifer Vinzdor deyib.
Təşkilat Azərbaycanda Qərb radiostansiyalarının yayımının dayandırılması və hökuməti tənqid etdiyinə görə çoxsaylı jurnalistlərin həbsi faktlarını xatırladır. Bütün baş verənlər hakimiyyətin bələdiyyə və sonrakı parlament seçkiləri ərəfəsində KİV sahəsini daha çox nəzarətə götürmək cəhdi kimi qiymətləndirilir.
"Ənənəvi mətbuat növlərinin fəaliyyətinin kəskin şəkildə məhdudlaşdırılmasından sonra Azərbaycanda sosial jurnalistika və onlayn müzakirələr xüsusi əhəmiyyət kəsb etməyə başlayır. Buna görə bloggerlərin həbsi xüsusilə narahatlıq doğurur, çünki cəmiyyətin informasiya əldə etmək imkanlarını məhdudlaşdırır", - deyə təşkilatın digər nümayəndəsi Kristofer Uolker qeyd edib.
"Sərhədsiz reportyorlar" isə öz bəyanatında qeyd edir ki, "məhkəmə əvvəldən axıra kimi biabırçı olub". Avropa İnsan Hüquqları Konvensiyasını imzalamış bir ölkə necə bu qədər kobud və həyasız hərəkət edə bilər", - deyə bəyanatda çox kəskin şəkildə qeyd olunur.
Analitiklərə görəsə, bütün verilən bu bəyanatlar nə qədər sərt səsləndirilsə də, nəticəsiz qalacaq. Azərbaycan hökuməti yalnız öz iradəsi ilə kimisə azad edə bilər və sözsüz ki, 2010-cu il parlament seçkilərinə qədər ictimai baxımdan fəal olan gənclər və baş redaktorların azad ediləcəyi gözlənilmir. Avropa Şurasında isə Azərbaycanın üzvlük məsələsinə baxılmayacaq. Ən azı Azərbaycan tərəfi bu qurumun Dağlıq Qarabağ münaqişəsində tutduğu mövqe və ya elə Ermənistanda keçirilən son prezident seçkilərində baş verənlərə görə bu ölkəyə qarşı hər hansı sanksiya tətbiq etmədiyini qabardaraq, Avropa Şurasını qərəzli olmaqda ittiham edəcək.
