Cümə günü Reportyorların Azadlıq və Təhlükəsizlik İnstitutunun (RATİ) mətbuat mərkəzində BMT-nin İşgəncələr Əleyhinə Komitəsində Azərbaycan üzrə keçirilən dinləmələrin yekunlarına dair mətbuat konfransı keçirilib("Turan").
Cenevrədəki dinləmələrdə iştirak etmiş RATİ əməkdaşı Rəsul Cəfərov Birləşmiş Millətlər Təşkilatının (BMT) İşgəncələr Əleyhinə Komitəsinin (İƏK) 43-cü sessiyası çərçivəsində Azərbaycanda işgəncə və digər qeyri-insani davranış halları ilə bağlı müzakirələrin yekun nəticələri haqqında məlumat verərək, Azərbaycan hökumətinin İƏK-ə təqdim etdiyi 3-cü dövri hesabatın ümumi xarakter daşıdığını, yarımçıq və anlaşılmaz olduğunu bildirib.
O, Azərbaycan hökuməti tərəfindən təqdim edilən hesabatda dəqiq statistik məlumatların verilmədiyini, Cinayət Məcəlləsində işgəncə tərifində "ayı-seçkilik" anlayışının nəzərdə tutulmadığı, 2001-2008-ci illərdə CM-in 133-cü maddəsi ilə 161 şəxsin məsuliyyətə cəlb edilməsinin təfərrüatlarının izah edilmədiyi, hüquqi yardım səviyyəsinin aşağı olduğu, gənc bloggerlər Adnan Hacızadə və Emin Millinin tibbi yardım almadığı və s. kimi məqamları qeyd etmişdir.
Bununla belə, Demokratik Təsisatlar və İnsan Haqları İctimai Birliyinin sədri Elçin Abdullayev öz növbəsində bildirib ki, işgəncələrlə bağlı problemdə vətəndaş cəmiyyətinin çox böyük təqsiri var.
Qeyd edək ki, BMT-nin İşgəncələr Əleyhinə Komitəsində Azərbaycan üzrə keçirilən dinləmələrdə hüquq müdafiə təşkilatlarından RATİ əməkdaşı Rəsul Cəfərov, Hüquq Müdafiəçilərinin Cənubi Qafqaz Şəbəkəsinə daxil olan Azərbaycan QHT-ləri hesabat üzrə bəyanatla çıxış ediblər.
|
