Şou-biznes "donuz qripi"ndən necə qorunur?

Əhalinin qorxulu röyasına çevrilən "donuz qripi" şou-biznes və incəsənət adamlarına təsir etməyib. Lent.az-ın kiçik araşdırmasında da bu qənaət öz əksini tapıb. Qeyd edək ki, şou dünyasını qlobal xəstəliklə yanaşı günahsız heyvanların adının hallandırılması da çox narahat edir. Eyni zamanda, kimisi fürsətdən istifadə edərək həmkarlarına ismarıc yollayıb, kimi də xalqı intizama dəvət edib. Görünən həqiqət budur ki, sabit və dəyişməz şou dünyasına heç nə təsir etmək iqtidarında deyil, hətta qorxulu xəstəlik belə. Xalq artisti Faiq Ağayev ötən quş qripi xəstəliyindən narahat olduğu qədər bu il narahat deyil: "Ötən il "quş qripi" yayılan zaman hətta təyyarədə belə maska taxmışdım. Amma bu il, açığı, bir o qədər də əhəmiyyət vermirəm. Buna baxmayaraq, metroda, ictimai nəqliyyat vasitələrində insanların maska taxmalarını tövsiyə edirəm". Nadir Qafarzadə həyəcanlı çağırışları ilə yadda qalıb: "Heç yadıma belə düşmür. Mən belə şeylərə çox fikir vermirəm. "Quş qripi", "at qripi", "donuz qripi", nə bilim... Sabahdan, yəqin, qarışqa qripi yayarlar. Bu nə deməkdir? Özümə gəlincə, hələ ki vitamin qəbul edirəm. Mikrofonu spirtlə silirəm. Sarımsaq yeyirəm.

REKLAM

Lakin maska taxmıram. Tanınmış olduğum üçün bir az ehtiyat edirəm". Xalq artisti İlhamə Quliyeva qripdən həkim məsləhəti ilə qorunur. Lakin ekrana çıxdığı və cəmiyyət arasında olduğu üçün maskadan istifadə etmir. İradə İbrahimova Bakı və Türkiyəyə sıx-sıx səfərlər etdiyindən səhhətinin qayğısına qalmağı unutmur: "Ümumiyyətlə, gigiyenaya çox diqqət yetirirəm. Adi günlərdə belə tez-tez əllərimi yuyur, oturduğum mühitin təmiz olmasına nəzarət edirəm. Qrip xəstəlikləri yayılandan sonra bu diqqəti daha da artırmışam. Artıq bundan sonrakı səfərlərimdə maskadan istifadə etməyi də düşünürəm".

Özünün şəxsi mikrofonu olmayan Elariz Məmmədoğlu qripin yayılmasından dolayı narahat olub. Bu səbəbdən yaxın günlərdə şəxsi mikrofon almağı düşünür. Həmkarlarına da mikrofonlarını ayırmağı tövsiyə edir. Nura Suri isə "ehtiyat igidin yaraşığıdır" prinsipinə əməl edib, profilaktik tədbirlər görür. Bütün Azərbaycan xalqına təmiz su içməyi məsləhət görür. Rəhim Rəhimli profilaktik tədbir üçün Türkiyəyə getməyi qərarlaşdırır. Dostları ilə birlikdə peyvənd vurdurmaqla xəstəlikdən özlərini sığortalamaq niyyətindədir. Rəhim səfər zamanı maska ilə gəzməyi düşünür.

"Eurovision-2008" təmsilçisi Elnur Hüseynov isə xəstəlikdən ehtiyat etdiyi qədər həkim diaqnozundan da ehtiyatlanır. Müğənni yoluxucu xəstəliklərə qarşı vurulacaq qoruyucu peyvəndlərlə özünü qorumaq niyyətindədir. Eyni zamanda deyir ki, əgər xəstəlik kütləvi hal alarsa, o zaman maska taxacaq. Röya Ayxan isə hadisəyə "müsəlman sayağı" yanaşır. Müğənni "ölüm haqdır" deyərək, nə qorunur, nə də şəxsi mikrofonunu başqasına verməkdən çəkinir. Səidə Sultan da taleyin qismətinə inananlardandır. Öz qədəri ilə barışmış müğənni maskadansa alnıaçıq, üzüağ gəzməyə çalışır: "Onsuz da bir gün hamı öləcək..." Nüşabə Ələsgərli, sən demə, xəstəlik yayılmazdan dörd-beş ay öncə maska alıb, xarici ölkələrdə istifadə edirmiş. Müğənni artıq məclislərdə həmkarları və tanımadığı şəxslərlə qucaqlaşmamağa çalışır.