Türkiyədə tanınmış rok ifaçısı Mişa ilə işbirliyinə başlayan bizim əməkdar incəsənət xadimi, bəstəkar Gövhər Həsənzadə iş qrafikini bir qədər sıxlaşdırıb. Əsas məqsədi Azərbaycan və türk sənətçiləri arasında tutarlı körpü yaratmaq olan bəstəkarın yenilikləri haqqında "Ayna"ya danışan mətbuat əlaqələndiricisi Ceyran Nəriman oldu.
"Bilindiyi kimi, Gövhər xanım türk rokçusu Mişa ilə yaradıcı əməkdaşlığa başlayıb. Amma əslində onun Türkiyə şou-biznesinə bir bəstəkar kimi qoşulmasında türkiyəli şairə Ayşe Yılmaz Birgülün çox böyük zəhməti olub. Təvazökarlıqdan uzaq səslənsə də, Gövhər Həsənzadə yeganə Azərbaycan bəstəkarıdır ki, Türkiyədə müəllif hüquqları qanun çərçivəsində qorunur. Məşhur sənətçilər onun bəstələrini ifa edəndə mütləq şəkildə vurğulayırlar ki, Azərbaycan bəstəkarının əsərini ifa edirlər. Gövhər xanımın türk sənətçiləri ilə əməkdaşlığı təkcə Mişa ilə yekunlaşmır. Belə ki, populyar türk müğənnisi Pınar Aylin onun "Sevgi yolu" mahnısına türkcə sözlər yazdırıb ifa edib. Populyar Azərbaycan estrada müğənnisi Ayaz Qasımovun repertuarından olan bu mahnı Pınar Aylinin ifasında "Masal ya bu" (Nağıldırmı bu) kimi dinləyicilərə təqdim olunub. Hətta Pınar xanım bu mahnını yeni buraxdırdığı alboma daxil edib və musiqi toplusuna həmin mahnının adını verib".
Mətbuat katibinin sözlərinə görə, bəstəkar bir neçə Azərbaycan müğənnisi üçün də hit olacaq mahnılar yazmağa davam edir. "Türk rokçu Mişa Gövhər xanımın müğənni İzzət Bağırov üçün yazdığı "Yar aman, yar" mahnısını ifa edib. Gövhər xanımla İzzətin yaradıcılıq əməkdaşlığı uzun illəri əhatə edir. İndi isə onlar daha bir hiti dinləyicilərə təqdim ediblər. Hazırda "Mən indi neyləyim" adlı yeni mahnının klip çəkilişləri üçün hazırlıq prosesi gedir. Ekzotik məkanlarda çəkiləcək klipdə İzzət növbəti dəfə adət etmədiyimiz ampluada tamaşaçıların görüşünə gələcək.
Bəstəkarın daha bir yaradıcı işbirliyi isə estrada müğənnisi İradə İbrahimova ilə gerçəkləşəcək. Gövhər xanım İradə üçün "Saf sevgi" adlanan yeni bir mahnı yazıb. Bəlli olduğu kimi, İradə İbrahimova sənətdə ilk addımlarını atdığı vaxtdan Gövhər Həsənzadə yaradıcılığına vaxtaşırı müraciət edib. İstanbula gəlin köçən müğənni sözügedən mahnını özü ilə bərabər Türkiyəyə aparıb. Mətbuat katibi deyir ki, İradə orada musiqini lentə aldırıb, ifa etmək niyyətindədir.
Gövhər xanımın növbəti yaradıcılıq əməkdaşlığı, daha çox muğam ifaçısı kimi tanınan müğənni Bahar Lətifqızının adı ilə bağlıdır. Muğam oxumaqla yanaşı, həm də estrada ifaçısı kimi addımlamaq istəyən Bahar bəstəkarın müəllifi olduğu "Alıb başımı hara gedim" mahnısını ifa edib. Azərbaycan və türk dillərində oxunan mahnı, həm yerli radio dalğalarımızda, həm də Türkiyədə fəaliyyət göstərən FM dalğalarda səslənir. Gövhər xanımın hələlik sonuncu layihəsi isə gənc müğənni Orxan Babazadəylə nəzərdə tutulub. Burada diqqət çəkən məqam odur ki, sənətdə iri adımlarla irəliləməyi qarşısına məqsəd qoyan Orxan israrla Gövhər xanımın protejesi olmaq niyyətini dilə gətirib: "Yəni söz verib ki, o, yaradıcılığı boyu ancaq Gövhər Həsənzadə ilə işləmək arzusundadır. Bir sözlə, Gövhər xanımdan sözün yaxşı mənasında əl çəkmək kimi niyyəti yoxdur. Həmişə gənclərə diqqət göstərən bəstəkar, Orxan üçün "Dərdini çəkim" adlı mahnı yazıb və söz verib ki, yaxın üç ildə gənc müğənnini ulduza çevirəcək. İndi isə Orxan ona yazılan mahnıya klip çəkdirməklə məşğuldur. Mahnıya rejissor kimi də tanınan teleaparıcılar - "Xəzər TV"də "Eldən-elə" proqramının aparıcıları Azər və Vüsalə cütlüyü quruluş verəcəklər.
|
