Yazıçı, dramaturq Əli Əmirlinin "Köhnə ev" əsəri Gürcüstanda səhnəyə qoyulub. Bu günlərdə təqdimatı keçirilən tamaşa Azərbaycan dilində səsləndirilib. Əsər Tiflisin A.Xoreya adına Aktyorlar Evində səhnə həllini tapıb. Tamaşada Gürcüstandakı Heydər Əliyev adına Azərbaycan Dövlət Teatrının aktyorları - Namiq Musayev, Şeyla Şamoyeva, Fazil Bayramov, Binəli İslamoğlu və başqaları oynayıblar. "Köhnə evi" rejissor Namiq Hacıyev səhnələşdirib.
Rejissorun bildirdiyinə görə, əsəri səhnələşdirmək bir qədər əziyyət tələb edib. O, problemin maddi və texniki çatışmazlıq səbəbindən yarandığını bildirib. Buna baxmayaraq bacarıqlı aktyorlar tragikomik janrda təqdim edilən tamaşanın öhdəsindən gələ biliblər.
Qeyd edək ki, sözügedən əsərdə kommunizmlə kapitalizm bir evin içində mübarizə aparır. Kommunist ağsaqqal öz ideyalarından əl çəkmir, bərabərlik üçün mübarizə apardığını deyir. Ədalət üçün vuruşan ağsaqqal "İdeya üçün ac qalmaq olar" şüarı ilə çıxışlar edir. Kapitalist gənc isə puluna güvənir, hər şeyin bazarda həll olunduğu fikrini müdafiə edir.
|
