 |
çap et |  |
|
|||
Paytaxtda və ölkənin ayrı-ayrı rayonlarında "Quest net" firması adı altında fəaliyyət göstərən bu şəbəkə, işə götürəcəkləri barədə yalan vədlər verməklə, əsasən gəncləri zərgərlik məmulatlarının satışına cəlb edib. Dəstə üzvləri on minlərcə vətəndaşa çəkisi üç qramadək olan qızıl məmulatlarını həqiqi dəyərindən on dəfə baha qiymətə - 800-1500 ABŞ dollarına sataraq külli miqdarda qazanc götürüblər.
"Quest net" firmasının rəhbəri Valeh Ağayev, Azərbaycan Dövlət Televiziyasının (AzTV) redaktoru (!) Arif Babayev, firmanın işçiləri Yalçın Səmədov, Tərlan Baxışəliyev, Mübariz Quliyev, Elşən Əliyev, Zaur Babayev, Arif Hüseynov, Natiq Şirinov, Şakir Ağayev, Azərbaycan İslam Unversitetinin tələbəsi (!) Vüqar Məmmədov, İran vətəndaşları Bəhram Deyləmi və Bağbani Mahmudzadə indi məhkəmə qarşısında dayanıblar. Onlar CM 178.3.1 (mütəşəkkil dəstə tərəfindən dələduzluq) maddəsi ilə ittiham olunurlar. ...Firmanın rəhbərləri, mal almış hər bir şəxsin sonradan iki nəfərin, sonuncuların isə daha dörd nəfərin pulunu almaqla və bu işi həndəsi silsilə şəklində davam etdirməklə şəbəkə üzvlərinin artımına nail olublar. Eyni zamanda, fəallıq göstərəni "lider" adlandıraraq satış rəhbəri qismində müstəqil fəaliyyətə həvəsləndiriblər. İnsanları inandırmaq və kriminal şəbəkəyə daha çox vətəndaş cəlb etmək üçün ofislərində seminar və praktiki məşğələlər təşkil ediblər. Piramida üsulu ilə qurduqları bu şəbəkəyə cəlb olunmuş vətəndaşlardan aldıqları pullar hesabına özlərinə yüksək əməkhaqqı götürüb, eləcə də ofis xərclərini ödəyiblər. "Quest net"in mərkəzi ofisi Honq-Konq şəhərində offşor zonada yerləşir. Firmanın Azərbaycan agentliyinin rəhbəri Saatlıda doğulmuş, 42 yaşlı Valeh Ağayevin təşkilatçılığı ilə cinayətin qurbanına çevrilmiş 20 mindən çox şəxsdən cəmi 5100 nəfərinə zərgərlik məmulatları verilib, daha 15 minə yaxın sadəlövh vətəndaş hədiyyə alacağı və işə düzələcəyi vədi ilə aldadılıb. Dəyəri 5 dollardan 96 dollaradək olan qızıl əşyalar Valeh Ağayevin vasitəsi ilə mütəmadi şəkildə Bakıya gətirilərək əvvəlcədən pulu alınmaqla vətəndaşlara paylanıb. Yığılan pulların cüzi bir qismi Honq-Konqdakı bank hesabına köçürülərək, Almaniyadan ucuz zərgərlik məmulatlarının alınmasına yönəldilib, əksər hissəsi isə şəbəkədaxili elektron kart vasitəsi ilə nağdlaşdırılaraq talanıb. Mütəşəkkil dəstənin Binəqədidə yerləşən ofisinə baxış zamanı 859 ədəd müxtəlif zərgərlik məmulatı, hədiyyələr, kompüterlər, habelə hesabatlar və digər sənədlər aşkar edilərək götürülüb. Ağır Cinayətlərə Dair İşlər üzrə Məhkəmədə mühakimə olunan bu şəxslər zamindədir. Hakim Mahmud Ağalarovun sədrliyi ilə keçirilən prosesdə təqsirləndirilən şəxslər ifadə veriblər. Onlar özlərini təqsirli bilməyiblər. Bildiriblər ki, etdikləri əməllərdə cinayət tərkibi yoxdur. |
