Futbol üzrə milli yığma komandamız Birləşmiş Ərəb Əmirliklərindədir (BƏƏ). Berti Foqtsun başçılıq etdiyi yığmamız bu ölkədə təşkil olunacaq mini turnirdə iştirak edəcək.
Komandamız BƏƏ-yə Türkiyədən yola düşüb. Belə ki, hələ ötən həftə Türkiyəyə yola düşən əsas komandamız bu ölkədə qısa hazırlıq keçib. "Hilton Otel"də məskunlaşan millimizin üzvləri məşqlərini "Kayserispor" klubunun bazasında keçiblər. Daha sonra BƏƏ-yə yola düşən heyət bu ölkənin Əl-Ayn şəhərində, "Al-Ayn Srorts & Cultural Club" stadionunda hazırlığını davam etdirib.
Turnirdə yığmamızla yanaşı, BƏƏ, İraq və Çexiya milliləri də mübarizə aparacaq. Komandamız ilk oyununu sabah Bakı vaxtı ilə saat 16:45-də, "Tahnoun Bin Mohammed" stadionunda İraq millisinə qarşı keçirəcək. Bu oyunun qalibi noyabrın 18-də BƏƏ-Çexiya matçının qalibi ilə, eyni zamanda hər iki cütlüyün məğlub komandaları bir-biri ilə qarşılaşacaq.
Yeri gəlmişkən, Dubay turniri ərəfəsində AFFA futbol üzrə milli komandamızın baş məşqçisi Berti Foqtsla yeni müqavilə bağlayıb. AFFA prezidenti Rövnəq Abdullayev 63 yaşlı mütəxəssislə görüşərək onun ötən dövr ərzindəki fəaliyyəti barədə hesabatını və gələcək üçün planlarını dinləyib. Müzakirələrdən sonra qərara alınıb ki, Berti Foqtsla müqavilənin müddəti daha 2 illiyə uzadılsın. Başqa sözlə, almaniyalı məşqçi 2011-ci ilin dekabrınadək milli komandamızın baş məşqçisi işləyəcək.
Berti Foqts 2008-ci ilin aprelində yığmanın baş məşqçisi təyin olunub. Onunla əvvəlki müqavilənin müddəti bu ilin dekabrında başa çatmalı idi.
Yığma ilə bağlı daha bir xəbər isə Rəşad Sadıqovun yenidən millinin heyətinə çağırılmasıdır. AFFA saytında verilən məlumata görə, neçə vaxtdır zədədən əziyyət çəkən və bu səbəbdən ölkənin əsas komandasından uzaq düşən 27 yaşlı müdafiəçi yenidən yığmaya cəlb edilib.
Ağdamın "Qarabağ" klubunun futbolçusu millinin düşərgəsinə sabah yola düşəcək. Zədəli olduğu üçün millinin həkimləri tərəfindən müayinə olunacaq. Rəşad fərdi qaydada məşq edəcək.
|
