Bu günlərdə məclislərin birində qonaq qismində iştirak edən xalq artisti Yalçın Rzazadə müğənni Elarizin canlı ifasını dinlədikdən sonra onun haqqında yüksək fikirlər söyləyib: "Elariz bir müğənni kimi mənim üçün həmişə maraqlı olub. Onun özünəməxsus ifa tərzi, ampluası var. Ola bilər, kimlərsə onun ifasını bəyənməsin. Amma mən bir sənətkar kimi etiraf edirəm ki, Elariz gözəl oxuyur. Bundan başqa, bəzi sinəsinə döyən tanınmış müğənnilərdən fərqli olaraq, Elarizin canlı ifası da təmiz və səliqəlidir. Elə müğənnilər var ki, fonoqramla səsi gözəl səslənir. Ancaq canlı oxuyanda adamı dəhşət bürüyür. Sanki fonoqramdakı səs onlara məxsus deyil. Ancaq Elarizdə belə deyil. Buna görə də bir müğənni kimi mən onu dəstəkləyirəm. Üstəlik də Elariz bir çoxlarından fərqli olaraq saatlarla canlı oxuya bilir. Bu isə müğənni üçün əsas amillərdən biridir. Qoy bir çoxları məndən inciməsinlər, Elariz sözün həqiqi mənasında əsl sənətkardır. Kim buna şübhə edirsə, canlı oxumaq üçün onunla yarışa qatılsın!"
Xalq artisti tərəfindən haqqında bu cür yüksək fikirlər eşidən Elariz öz növbəsində sənətkar dostuna minnətdarlıq etdi: "Yalçın Rzazadə əvəzolunmazdır. Azərbaycan estradasının təməlini qoymuş sənətkarlarımızdandır. Belə bir şəxsiyyətin haqqımda bu cür yüksək fikirlər söyləməsi mənim üçün böyük şərəf və fəxrdir. Yaxşı ki, səhnəmizdə belə sənətkarlar var. Yalçın bəyin və eyni zamanda, digər xalq artistlərimiz İlhamə Quliyevanın, Flora Kərimovanın, əməkdar incəsənət xadimi Ruhəngiz Qasımovanın və bir çox sənətkarlarımızın sayəsində bu sənətdən ilham alaraq ruhdan düşmürəm. Var olsunlar ki, həmişə məni dəstəkləyirlər. Belə sənətkarlar mənim sənətim haqda yüksək fikirlər söylədikdən sonra kimlərinsə haqqımda söylədikləri mənfi rəylər əsla əhvalımı pozmur. Mən musiqimizdə varam və bundan sonra da olacam".
|
