Müğənni Nura Suri uzun aylardan bəri üzərində çalışdığı ilk diskinin və yeni klipinin təqdimatını keçirib. "Sanki gecə idi" adlanan alboma müğənninin ifasında səslənən 14 mahnı daxil edilib. Nura deyir ki, bu, onun sənətə gəldiyi gündən bəri oxunmuş ən yaxşı mahnıları arasından seçilib. Yaxın aylarda isə onun növbəti, yeni mahnılardan ibarət diski işıq üzü görəcək.
Müğənninin kiçik söhbətindən sonra onun "Səndən öyrəndim" adlı mahnıya çəkdirdiyi klip nümayiş olundu. Ağ, qara və qırmızı rəng çalarlarını əks etdirən klipdə nostalji özünü göstərir. Kübar xanım rolunda çıxış edən Nuranın bu imiclə diqqət çəkdiyini söyləyə bilərik. Türk mahnısı olan "Səndən öyrəndim"in müəlliflərini anonim təqdim edən Nura bunu bilərəkdən edib. Müğənni deyir ki, bu, Azərbaycan mahnılarını eyni isim altında təqdim edən türkiyəli həmkarlarına cavab mesajıdır (?). Klipin rejissoru Fuad Əlişov isə bildirdi ki, ekran işi Nd-Cam rəqəmli kamera ilə lentə alınıb və burada kompüter qrafikasından istifadə edilib.
Yaradıcılıq işini böyük həvəslə sərgilədikdən sonra onun şərəfinə hazırlanan tortu kəsən sənətçi xanım tezliklə daha bir yenilik edəcəyini bildirdi. Dedi ki, yaxın aylarda onun albomunun təqdimatı ilə yanaşı, nəfis tərtibalı saytı istifadəyə veriləcək.
|
