Azərbaycan Premyer Liqasının bu gün başlanan X turu 2 möhtəşəm oyunla yadda qalacaq. Amma əvvəlcə çempionatın IX turunun oyunlarına qısa nəzər salaq.

Turun ən maraqlı oyunlarından biri Salyanda baş tutub. Yerli "Muğan" Tovuzun "Turan" klubunu qəbul edib və meydanı xalsız tərk edib. Matç olduqca maraqlı keçib və qapılara 5 top vurulmaqla yanaşı, hakim futbolçulara 3 qırmızı vərəqə göstərib. Qonaqların heyətində isə Samir Musayev het-trikə imza atıb. Bu, cari mövsümdə qeydə alınan ilk het-trik olub.

"Neftçi" Tofiq Bəhramov adına Respublika stadionuna qayıdışını qələbə ilə qeyd edib. Böyükağa Ağayevin uzun fasilədən sonra ölkə çempionatında debütü isə uğursuz alınıb. Onun baş məşqçi olduğu "Standard" Sumqayıtda "Olimpik-Şüvəlan"a uduzub.

"Simurğ" - "İnter" matçında maraqlı hadisə baş verib. Belə ki, baş hakim Vüsal Əliyev zədələndiyindən görüşü davam etdirə bilməyib. Onu dördüncü hakim Rasim Məmmədov əvəzləyib. Turun digər matçlarında bu nəticələr qeydə alınıb: "Qarabağ"- "Xəzər-Lənkəran" - 1:0, "Qəbələ" - "Bakı" - 0:2, "Simurğ" - "İnter" - 1:1, "Muğan" - "Turan" - 2:3, "Standard" - "Olimpik-Şüvəlan" - 0:1, "Neftçi" - "Karvan" - 1:0.

X tura gəlincə, son 5 ilin barışmaz rəqibləri olan "Xəzər-Lənkəran" və "Neftçi" bu dəfə Lənkəranda üz-üzə gələcək.

2004-ci ilin yayında "Xəzər-Lənkəran" yaranandan sonra flaqmanın bu komanda ilə oyunları xüsusi prinsipiallıq kəsb edir. Özü də komandaların turnir cədvəlindəki vəziyyəti onların rəqabətinə təsir etmir. Budəfəki çempionat yeni sistemlə, yəni altılıq üzrə keçirildiyindən və burada "qızıl xallar" nəzərə alındığından, görüşü 3 yox, 6 xallıq oyun kimi dəyərləndirmək olar. "Xəzər-Lənkəran"la "Neftçi" isə mükafata iddialıdır və böyük ehtimalla altılığa düşəcəklər.

"İnter"lə "Qarabağ"ın qarşılaşması isə turnir cədvəli baxımından turun mərkəzi oyunudur. Hər halda, hazırda turnir cədvəlinə məhz bu komandalar başçılıq edirlər. "İnter" topların daha yaxşı fərqinə görə rəqibini qabaqlayır. Ancaq Premyer Liqada komandaların xalları bərabər olacağı halda, şəxsi görüşlər əsas götürüləcək. Sözsüz ki, bu amil "İnter"lə "Qarabağ"ın öz aralarındakı oyunun əhəmiyyətini artırır. Digər prinsipial məqam ondan ibarətdir ki, "Qarabağ" ötən mövsüm ölkə kubokuna məhz "İnter"i məğlub etməklə (1:0) sahib çıxdı.

7 noyabr: "Bakı" - "Karvan", "Qəbələ" - "Muğan", "İnter" - "Qarabağ"; 8 noyabr: "Olimpik-Şüvəlan" - "Simurğ", "Turan" - "Standard", "Xəzər-Lənkəran" - "Neftçi".