Azərbaycan kuboku uğrunda yarışın 1/8 mərhələsinin ilk oyunları keçirilib. Bu mərhələdə Unibank Premyer Liqa təmsilçiləri də iştirak edib. Güclülər dəstəsinin 12 klubunun kubok uğrunda mübarizəyə qoşulması yarışa olan marağı artırıb. Əvəzində I divizionun 4 təmsilçisi - "Gəncə", "Şahdağ", "Bakılı" və "Neftçi İSM"nin yüksək liqa klubları ilə mübarizədə aşkar çətinlik çəkiblər. Oyun nəticələri də onların növbəti mərhələyə çıxmaq şanslarının yox dərəcəsində olduğunu göstərir. Qalan dörd matç isə Premyer Liqa təmsilçiləri arasında oynanılıb.

1/8 final mərhələsinin ilk oyunları çərçivəsində keçirilən "Bakı" - "Bakılı" qarşılaşmasında 2009/10 mövsümünün yeni rekordu qeydə alınıb. Rəqibini 6:0 hesabı ilə darmadağın edən Bülənt Korkmazın komandası cari mövsümün ən böyükhesablı qələbəsini qazanıb. Buna qədər Premyer Liqa və kubok oyunları üçün ən böyük nəticə "İnter"ə məxsus idi. Kaxaber Sxadadzenin başçılıq etdiyi komanda "Muğan"a çempionat matçında 6:1 hesabı ilə qalib gəlmişdi.

Sumqayıtda keçirilən "Standard" - "Turan" qarşılaşması (3:1) birdən-birə üç məqama görə əlamətdar olub. Belə ki, həm "Standard", həm klubun yeni baş məşqçisi Böyükağa Ağayev və nəhayət, sumqayıtlı azarkeşlərin qələbə həsrətinə son qoyulub. Belə ki, mövsümlərarası fasilədə Bakıdan Sumqayıta köçən bank təmsilçisi gənclik şəhərində məskunlaşdığı vaxtdan ilk qələbəsini qazanıb. Bu klub sonuncu qələbəsini ötən mövsümün sonuncu turunda - mayın 16-da qazanmışdı. я "Olimpik-Şüvəlan" "Şəfa" stadionunda "Qəbələ"ni moldovalı hücumçu Anatoli Doroşun dublu sayəsində məğlub edib. Bununla da Əsgər Abdullayev vaxtilə rəhbərliyi altında çıxış etmiş gənc həmkarı Ramiz Məmmədovdan ötən mövsümdəki uğursuzluğun əvəzini çıxıb.

"Neftçi" isə 179 gündən sonra böyük hesablı qələbə qazanıb. Cari mövsümdə ilk dəfə rəqibinə 3 və daha artıq top fərqi ilə qalib gələn flaqman bu həsrətə ölkə kubokunun 1/8 final matçında son qoyub.

Vaqif Sadıqovun komandası baş məşqçilərinə belə bir qələbə sevincini "Neftçi İSM" görüşündə bəxş ediblər.

1/8 finalın ilk oyununda inamlı qələbə qazanan "Qarabağ", "İnter" və "Xəzər-Lənkəran" da növbəti mərhələyə çıxmaq şansı qazanıblar.

Azərbaycan kuboku, 1/8 final mərhələsinin ilk oyunlarının nəticələri: "Olimpik-Şüvəlan" - "Qəbələ" - 2:0, "Qarabağ" - "Şahdağ" (Qusar) - 4:0, "Standard" - "Turan" - 3:1, "Neftçi" - "Neftçi İSM" - 5:0, "Bakı" - "Bakılı" - 6:0, "Xəzər-Lənkəran" - "Muğan" - 3:1, "Simurğ" - "Gəncə" - 2:0, "İnter" - "Karvan" - 4:0.

Bu mərhələnin cavab görüşləri noyabrın 11-də keçiriləcək.