Bakıda gizli şəkildə böyrəkköçürmə əməliyyatları icra olunduğu barədə söhbətlər gəzir. Tibbi qaynaqlardan əldə etdiyimiz bilgilərə görə, bu əməliyyatları İsraildən gəlmiş həkimlər icra edir. Donorlar kasıb ərəb ölkələrindən, xəstə isə Avropadan gəlir. Bakıda, sadəcə, onlara özəl klinikanın palatası verilir və yerli həkim cərrahiyyə əməliyyatını aparan həkimə assistentlik edir.
Xatırladaq ki, Azərbaycan Səhiyyə Nazirliyinin tabeliyində olan tibb ocaqlarının heç birində böyrəkköçürmə əməliyyatları aparılmır.
Bəs niyə Azərbaycan? Bu belə izah edilir ki, bizim ölkəmiz transplantasiya əməliyyatları üçün hüquqi nəzarətin olmadığı ölkələrdən biridir, digər ölkələrdə, özəlliklə Avropada bu məsələ çox ciddi şəkildə reqlamentləşdirilir və işin hüquqi tərəfləri çox ciddi şəkildə tənzimlənir. Digər tərəfdən, xarici həkimlər ölkəmizin özünəməxsus "qaydalarını" mənimsəmişlər: "Azərbaycanda hər şey mümkündür, təki pul olsun".
Yeri gəlmişkən, postsovet ölkələrində orqan köçürmələrinin hüquqi tərəfləri lazımi şəkildə tənzimlənmədiyindən bu məsələ onlarda da aktualdır. Məsələn, Rusiyada bu mövzu yeni çəkilən filmlərdə süjetlər təşkil edir, mətbuatda qalmaqallar, məhkəmə araşdırmaları ilə müşayiət olunur.
...Olduqca müəmmalı xəbər idi. Belə ki, sağlamlıq problemi olan ölkə vətəndaşları bu kimi əməliyyatlar üçün Rusiya, Avropa ölkələri və ya Türkiyəyə üz tuturlar. Yaxud ağır xəstələr özlərini vaxtaşırı olaraq Bakı xəstəxanalarına gələn türkiyəli, rusiyalı və ukraynalı peşəkar həkimlərə göstərirlər.
Təsəvvür edək: böyrəyinin bir tayını yaxşı qiymətə satmaq istəyən donor elektron yazışma ilə Bakıya gəlir. Onu mehmanxanada yerləşdirirlər, xəstə Avropadan gəlir, həkim-professional İsraildən. Donorun pulu onun istədiyi bankın hesabına oturdulur. Donor özəl klinikaya gəlir, burada onun böyrəyi çıxarılır və xəstə bir neçə gündən sonra ayağa durur və Azərbaycandan yola salınır. Pasiyent də bir müddətdən sonra ölkəsinə yola salınır. Bu tibbi biznes tərəfdaşlara yaxşı gəlir gətirir.
Əlimizdə olan bilgiyə görə, bu yaxınlarda gürcüstanlı soydaşımız olan bir pasiyentə Bakı klinikasında böyrəkköçürmə uğursuzluqla nəticələnib və pasiyent həyatını itirib.
Tanış həkim danışır: Bir yaxın adamım zəng vurub nə desə yaxşıdır? Onunla işləyən xidmətçi qadın ailəsinin ehtiyaclarını ödəmək üçün böyrəyinin birini satmaq istəyir və müştəri axtarır, ona varlı müştəri tapmaqda kömək etmək lazımdır.
Adam bu qəribə xahişə təəccüblənmiş həkimə deyib ki, bunda qeyri-adi heç nə yoxdur, Bakıda bu kimi əməliyyatların aparıldığı artıq sirr deyil.
Şəhərdə bu qeyri-leqal tibbi bizneslə əlaqəsi olan və yüksək texnoloji imkanlara malik iki özəl tibb mərkəzinin adı çəkilir.
|
