Reportyorların Azadlıq və Təhlükəsizlik İnstitutu (RATİ) Ədliyyə Nazirliyinin təşkilatda qəflətən yoxlamalara başlamasını hökumətin QHT-lərə qarşı yeni təzyiq kampaniyasının başlanğıcı kimi qiymətləndirir. Bu barədə RATİ-dən "Ayna"ya daxil olan bəyanatında deyilir.
RATİ bəyanatında beynəlxalq demokratik ictimaiyyətə müraciət edir. Hesab edir ki, bu cür hədələyici tərzdə əsassız və yersiz yoxlamalara başlamaq hökumətin müstəqil QHT-yə qarşı dözümsüzlüyünün bariz nümunəsidir. Onlar hökuməti müstəqil QHT-lərə qarşı dözümlü olmağa çağırırlar.
Srağagün ƏN Qeydiyyat və Notariat Baş İdarəsinin əməkdaşları saat 12.30-da RATİ-nin ofisinə zəng edərək, saat 15.00-da yoxlama üçün gələcəklərini bildiriblər. Öz növbəsində RATİ əməkdaşları ƏN əməkdaşına bildiriblər ki, təşkilatın sədri Emin Hüseynov Rumıniyada keçirilən QHT forumunda iştirak edir və yalnız noyabrın 1-də qayıdıb onların suallarını cavablandıra bilər. Buna baxmayaraq, ƏN əməkdaşları Səbinə Salmanova və Günel Həmidli elə həmin gün yoxlama məqsədi ilə gəliblər. Onlar RATİ-nin fəaliyyətinin nizamnaməyə və qanunvericiliyə uyğunluğunu öyrənmək fikrində olduqlarını demişlər.
RATİ-nin bu bəyanatına ƏN Qeydiyyat və Notariat Baş İdarəsinin rəis müavini Mehman Soltanov biganə qalmayıb. "Mediaforum"un məlumatına görə, M.Soltanov bildirib ki, hələ RATİ-də yoxlamalara başlanmayıb. Amma yoxlamalar mütləq olacaq. M.Soltanov RATİ-ni yoxlamalar barədə mətbuata məlumat yaymasını və bəyanat verməsini qınayıb və təşkilatın ünvanına ittiham səsləndirib.
|
