Dekabrın 25-də keçiriləcək bələdiyyə seçkilərində iştirak üçün bu günə kimi 1718 bələdiyyə üzrə 25.614 nəfərin namizədliyi irəli sürülüb və təsdiq edilib. Mərkəzi Seçki Komissiyasının (MSK) mətbuat xidmətindən APA-ya daxil olan məlumata görə, həmin şəxslərdən 4904 nəfəri qadındır.
Onlardan 12.723-ü ali təhsillidir. Seçki komissiyalarında namizədliyi təsdiq olunan şəxslərdən 24.117 nəfəri dairə seçki komissiyalarından imza vərəqələri alıb, həmin şəxslərin 8773 nəfəri namizədliklərinin qeydə alınması üçün tələb olunan sayda imzaları toplayaraq imza vərəqələrini və digər zəruri seçki sənədlərini müvafiq dairə seçki komissiyalarına təqdim edib. Artıq 398 bələdiyyə üzrə 2224 nəfərin namizədliyi qeydə alınıb.
Namizədlikləri özləri tərəfindən irəli sürülən şəxslərdən 6504 nəfəri bitərəfləri, digərləri isə 28 siyasi partiyanı təmsil edir. 16 siyasi partiya isə rəsmi olaraq seçki marafonuna qoşularaq bələdiyyə üzvlüyünə namizədlərini irəli sürüb.
Qeyd edək ki, builki seçkilərdə 1718 bələdiyyə üzrə 15.682 bələdiyyə üzvü seçilməlidir.
|
