Bakıda fırıldaqçı erməni qadın tutuldu

Bakı şəhərində dələduzluqla məşğul olan erməni qadın tutulub. Bu qadın vətəndaşların etibarından istifadə edərək onlara obyekt almaqda kömək etmək adı ilə külli miqdarda pulu mənimsəyib. Əsl adı Lidiya Qriqoryevna Balasanova olan bu qadın Nizami rayon Polis İdarəsinin 25-ci polis bölməsinin əməkdaşları tərəfindən saxlanıb.

Polis bölməsinlən ANS-ə verilən məlumata görə, həyat yoldaşının soyadını götürən qadın adını da dəyişib və Leyla İsgəndərova kimi şəxsiyyət vəsiqəsi alıb. O, əvvəllər milliyyətcə azərbaycanlı olan həyat yoldaşı Azad İsgəndərovla birlikdə dələduzluq əməlinə görə 8 il məhkumluq həyatı yaşayıb.

Hazırda L.Balasanovanın əməlindən zərərçəkənlərdən 6 nəfərin adı məlumdur. Balasanova 50 min manat aldığını etiraf etsə də, bu məbləğin 120-130 min manat olduğu ortaya çıxıb.

Zərərçəkmişlərin nümayəndəsi Abdulla Əfəndizadə bildirib ki, L.Balasanova onlara özünü neft şirkətlərindən birində yüksək vəzifəli şəxs kimi təqdim edib. Onun sözlərinə görə, qadın hətta vətəndaşları inandırmaq məqsədilə Daşınmaz Əmlak və Dövlət Reyestri Xidmətinin sabiq sədri Arif Qaraşov və Bakı meri Hacıbala Abutalıbovla danışıqlar apardığını deyirmiş.

A.Əfəndizadə L.Balasanovanın öz cinayət əməlini oğlu ilə birlikdə həyata keçirdiyini iddia edir.