Bakının qadın voleybolçulardan ibarət "Azərreyl" klubuna yeni baş məşqçi təyin olunub. Bundan sonra həmin vəzifədə türkiyəli Adnan Kistak çalışacaq. Klub bu mütəxəssislə bir illik müqavilə bağlayıb.
Son 25 ildə məşqçi kimi çalışan 58 yaşlı Kistak müxtəlif dövrlərdə Türkiyənin yeniyetmələr, gənclər və böyüklərdən ibarət yığmalarında işləyib. O, 4 il Türkiyə milli (1993-97-ci illər) komandasına rəhbərlik edib. Bundan başqa, Kistak bir sıra klublarda da çalışıb və ötən mövsüm "Fənərbaxça"ya Türkiyə superliqasında qızıl medallar qazandırıb. Azərbaycanlı voleybolçular Oksana Parxomenko və Valeria Korotenko məhz onun başçılığı altında oynayırdılar. Qeyd edək ki, "Azərreyl"in baş məşqçisi postunda uzun müddət Faiq Qarayev işləyib. O, 2002-ci ildə paytaxt klubuna "Top komanda" kubokunu qazandırıb.
|
