Ağır atletika üzrə milli yığma komandamız noyabrın 19-da Cənubi Koreyada başlanacaq dünya çempionatına hazırlığın son mərhələsindədir. Bu yarış bolqarıstanlı mütəxəssis Yanko Rusevin yığma komandamızın baş məşqçisi postunda ilk ciddi sınağı olacaq. Əcnəbi məşqçi dünya çempionatına hazırlıqla bağlı "azerisrort.com" idman saytına müsahibə verib. Müsahibəni qısa ixtisarla oxucularımızın diqqətinə çatdırırıq.
- Dünya çempionatına hazırlığın gedişindən razısızmı?
- Bolqarıstanın Varna şəhərində keçirdiyimiz təlim-məşq toplanışı çox məhsuldar oldu. Son on gündür ki, "AZAL" Aviasiya Akademiyasının idman zalında məşq edirik. Bakı məşqləri daha çox bərpaedici xarakter daşıyır. Komanda üzvləri Bolqarıstanda yaxşı mənada "yükləniblər" və indi bir qədər nəfəs dərməyə ehtiyac var.
- Bir neçə ay əvvəl demişdiniz ki, komanda üzvlərinin fiziki hazırlığı aşağıdır. Bəs vəziyyət indi necədir?
- Bizim ağırlıqqaldıranların potensialı böyükdür. Əgər digər komandalarda güclü atletlərin sayı bir neçə nəfərdirsə, Azərbaycan yığmasının bütün üzvləri yüksək yerlər uğrunda mübarizə apara bilər. Sadəcə, idmançılarımız məşq sisteminin qurulmasında rəqiblərinə uduzurdular. Amma indi vəziyyət dəyişir. Mən Azərbaycan yığmasını İvan Boyaşevin sistemi ilə məşq etdirirəm. Bu sistem dünya ağırlıqqaldırmasına Naim Süleymanoğlu, Xalil Mutlu və eləcə də mənim kimi olimpiya çempionlarını verib.
- Dünya çempionatından nə gözləyirsiz?
- Dünya çempionatı kimi sanballı yarış üçün bizim idmançıların təcrübəsi yetərli deyil. Əlbəttə, medallar uğrunda mübarizə aparmaq onlar üçün çətin olacaq, amma düşünürəm ki, gələn il ilk nəticələrimiz olacaq. Razılaşın ki, komandanın hazırlığını lazım olan səviyyəyə çatdırmaq üçün 3-4 ay çox az müddətdir. Bizim əsas məqsədimiz 2012-ci il London Olimpiadasında nəticə əldə etməkdir.
- Bəs ikiqat dünya çempionu Nizami Paşayevin hazırkı durumu necədir?
- Onun işi o qədər də asan olmayacaq. Çünki köhnə zədəsi özünü bildirir. Üstəlik, artıq dediyim kimi, biz uzunmüddətli proqramla məşq edirik və inanıram ki, bəhrəsini də görəcəyik.
- Komandaya baş məşqçi təyin olunanda demişdiniz ki, yığmaya legioner atletlər cəlb edilə bilər. İndi də həmin fikirdəsiz?
- İndi bu fikirdəyəm ki, buna ehtiyac yoxdur. Azərbaycanda əla ağırlıqqaldıranlar var, sadəcə, onlarla işləmək lazımdır. Komandada rəqabət var, idmançılar texnikanı bilirlər. Odur ki, yığmaya əcnəbi idmançıların gətirilməsinə ehtiyac görmürəm.
|
