Azərbaycan Kinematoqrafçılar İttifaqında Kino Evi layihəsinin təqdimatı olub. Qurumun mətbuat əlaqələndiricisi bildirir ki, layihə Bakıda gerçəkləşdiriləcək və onun müəlliflərindən biri Rüstəm İbrahimbəyovdur.
Kino Evləri Gürcüstan, Ermənistan və Orta Asiya ölkələrində artıq fəaliyyət göstərir. Rüstəm İbrahimbəyovun sözlərinə görə, Kino Evinin tikintisi üçün Bayılda, teleqüllədən bir az aralıda yer ayrılıb. Kinematoqrafçılar İttifaqının təşəbbüsünə əsasən yer alınıb və artıq tikintiyə başlamaq üçün yüksək məbləğə ehtiyac var. Qurum nümayəndələri "biz dövlətdən və ayrı-ayrı sahibkarlardan dəstək gözləyirik" deyə bildirirlər.
Kinematoqrafçılar İttifaqının xəbərində qeyd olunub ki, kinokompleks zonasında qədim Bakı arxitekturasına uyğun 3-4 mərtəbəli evlər bütöv bir kompleks təşkil edəcək Kompleksə mehmanxana, qonaq evləri, mağaza və butiklərin daxil edilməsi nəzərdə tutulur. Görünüşü Filarmoniyanı xatırladacaq Kino Evində filmlərin nümayişi və konsertlər üçün zal olması planlaşdırılır. Layihə Kino İttifaqı katibliyinin iclasında yekdilliklə bəyənilib və tezliklə dövlətə və sahibkarlara təqdim ediləcək.
|
