Dirijorun sözlərinə görə, Azərbaycanın Müstəqillik günü ilə bağlı Donetsk və Kiyevdə silsilə konsertlər verib. Əyyub Quliyevin sözlərinə görə, Donetsk Dövlət Opera Teatrında baş tutan ilk konsertin təşkilatçısı Dünya Azərbaycanlıları Konqresinin Ukrayna nümayəndəliyi olub. Azərbaycanın Ukrayna səfirliyi isə konsertə təşkilati dəstək verib:
"Konsertdə mənimlə bərabər tarzən, professor Ramiz Quliyev, muğam ifaçısı Elməddin İbrahimov və kaman ifaçısı Mərkəz Əliyev də iştirak edirdi. Konsertdə məqsəd həm klassik, həm də milli musiqini təbliğ etmək olub". Konsertdə Azərbaycanın dahi sənətkarlarından Üzeyir Hacıbəyov, Qara Qarayev, Fikrət Əmirovun simfonik orkestr üçün yazılmış ən parlaq əsərləri səslənib. Əyyub Quliyevin əlavəsinə görə, Kiyev konserti Dövlət Akademik Opera Teatrında keçirilib. Bu konsertdə iki dirijor iştirak edib. Əyyub Quliyevin sözlərinə görə, bu konsertin əsas təşkilatçısı Azərbaycanın Ukrayna səfirliyi olub:
"Təşkilati dəstək isə Heydər Əliyev Fondu, Azərbaycan və Ukraynanın Mədəniyyət və Turizm nazirlikləri tərəfindən verilib. Konsertdən öncə Heydər Əliyev Fondunun prezidenti Mehriban Əliyevanın, Mədəniyyət və Turizm Nazirliyinin təbrik məktubu oxunub. Bu konsertlərdə də hiss etdim ki, tara maraq böyükdür. Xaricilər üçün tar yenidən kəşf edilir".
|
