Oktyabrın 23-də gecə saatlarında hüquq-mühafizə orqanlarının Ağdaşda keçirdiyi xüsusi əməliyyat nəticəsində oktyabrın 18-də polisə silahlı müqavimət göstərmiş Ruzman Hüseynov öldürülüb.
Əməliyyat-axtarış tədbirləri zamanı Hüseynovun Kotavan kəndindəki evinin yaxınlığında gizləndiyi müəyyən edilib. O, yenidən polisə müqavimət göstərməyə cəhd edib, lakin öldürülüb.
Hüquq-mühafizə orqanlarından "Turan"a bəlli olub ki, xüsusi əməliyyat zamanı daxili qoşunların vertolyotlarından istifadə olunub.
Hüseynov oğurluq ittihamı ilə axtarışda idi. Oktyabrın 18-də polis Hüseynovu Kotavan kəndindəki evində saxlamaq istəyib. Lakin Hüseynov polis əməkdaşlarına silahlı müqavimət göstərib və gizlənib. Bu zaman Hüseynov kəndin keçmiş icra nümayəndəsi, 38 yaşlı Baxşəli Seyfənovun evinə gələrək, ona avtomatdan atəş açıb. Seyfənov aldığı yaradan hadisə yerində keçinib. Hüseynov həmçinin kənd sakini, 1972-ci il doğumlu Əhmədov Famil Qurban oğluna avtomatdan atəş açaraq, onu yaralayıb.
Son günlər Hüseynovun axtarışı və tutulması məqsədilə Ağdaşda və ətraf rayonlarda polis gücləndirilmiş iş rejiminə keçirilmişdi.
|
