Bakı Xoreoqrafiya Məktəbinin məzunu olan rəqqasə Oksana Rəsulova Moskvada keçirilən iki beynəlxalq hind rəqsləri festivalında uğurla çıxış edib. Bunlardan biri Hindistan Mədəniyyət Festivalı "Divaly-2009" adlanır. Həmin festivalda həmyerlimizin ifası birinci yerə layiq görülüb. Beynəlxalq tədbirdə 10-dan çox ölkənin təmsil olunduğunu bildirən rəqqasə dedi ki, festival yalnız solo ifalardan təşkil edilmişdi.
Festivalda ikinci yerə Ukrayna, üçüncü yerə isə Rusiya layiq görülüb: "İndiyə kimi bir çox beynəlxalq festivallarda iştirak etmişəm, ancaq ilk dəfəydi ki, çox güclü rəqiblərim vardı. Festivalın yekununda mənə birinci yerin kubokunu və birinci dərəcəli diplom təqdim etdilər". Rəqqasə ikinci mükafatanı 15-18 oktyabr tarixlərində Moskvada keçirilən Hind Rəqslərinin 3-cü açıq Festival-Müsabiqəsində alıb:
"Ötən il bu müsabiqədə mən birinciliyi qazanmışdım. Bu dəfə isə müsabiqədə birinci və ikinci yer Rusiya rəqqaslarına, üçüncü yer isə Azərbaycana verildi. Azərbaycanın adını üçüncü çəkəndə zaldakı tamaşaçılar təəccüblərini gizlədə bilmədilər. Festivaldan sonra münsiflər heyətində təmsil olunan müasir və klassik hind rəqslərini tədris edən müəllim Aşvanini Neqam mənə yaxınlaşdı və rəqsimə heyran olduğunu bildirdi. Dedi ki, həm artistlik, həm rəqs, həm də hind elementlərinə görə mənə ən yüksək xalı verib".
Azərbaycanlı rəqqasənin sözlərinə görə, bu festival Hindistanın Rusiyadakı səfirliyinin təşkilatçılığı ilə keçirilirdi. Festivalın sonunda qala konsertdə iştirak edən Oksana Rəsulova bir sıra təkliflər aldığını bildirir:
"India TV" kanalından bir neçə təklif aldım. Güman ki, tezliklə, kanalın bir sıra verilişlərində çıxış etməklə yanaşı, konsertlərdə də iştirak edəcəm. Eləcə də Hindistanda keçiriləcək müsabiqələrdə mənim namizədliyim irəli sürüləcək".
|
