İranın teokratik hakimiyyəti türkcə adlardan, kəlmələrdən vahimələnir. Azərbaycanlı iş adamları öz kiçik müəssisələrinə, mağazalarına, dükanlarına, kafelərinə türkcə ad qoyduqları üçün cinayət törətmiş adamlar kimi məhkəməyə cəlb olunurlar. Ötən bir il ərzində təkcə bununla bağlı 600-dən artıq "cinayət işi" açılıb...
Bu kimi kramol "əməllərlə" mübarizə metodunun anatomiyası belədir: Türkcə adı seçən iş yerlərinə məktubla xəbərdarlıq edilir, buna əməl etməyənlərə məhkəmənin qərarını göndərirlər. Həmin məktublarda dükan və şirkət yiyələrindən adların türk dilindən farscaya tərcümə edilməsi tələb olunur. Buna görə həmin şəxslərin dükanları və şirkətləri qapadılır. Adı və ya reklam yazısı Azərbaycan türkcəsində olan mağazaları bağlayırlar. ETTELAAT-ın yerlərdəki idarəsinin əməkdaşları mağaza sahiblərini hədələyir, tablolarda farsca məzmun daşıyan adlardan və farsca mətnlərdən istifadə edilməsi tələb olunur.
Qərbi Azərbaycan əyalətinin Sayınqala rayonundakı dükanlardan biri, Azərbaycan türkcəsində yaradıcılıqla məşğul olanların, ədəbiyyat həvəskarlarının hər gün toplaşdığı "Azərbaycan" kafesi idi. Hakimiyyət təmsilçiləri adına görə artıq bu kafenin qapısını möhürləyib.
"Baybak" Güney Azərbaycan tələbələrinin "Arman" adlı qurumuna istinad edərək bildirir ki, Misəm Purmustafa Sevgilitəpə adlı azərbaycanlı bir alim dünyadakı "elektrik çəmbərəsindən" faydalanaraq yeni bir ixtiraya imza atmışdır. O, öz ixtirası ilə liftlərə yeni görünüş verib, bu vasitənin daha səmərəli işləməsini təmin edib. Misəm Sevgilitəpə bu işini İran İslam Respublikasının ixtiraları qeydiyyata alan idarəsində dəftərə saldırmaq istəyib. Ancaq onun ixtirasında "Günəş" kəlməsini görən məsullar korrida cöngəsi qırmızı parçanı görəndə coşduğu kimi hiddətlənərək, sənədi qəbul etməkdən qətiyyətlə boyun qaçırmışlar. Onlar müəllifə deyiblər ki, bu sözü çıxar! Və həmin ixtira bu ilin sentyabrında (İrandakı təqvimlə 14.06.1388 Günəş ili, 60864 saylı iş) "Günəş"siz qeydə alınıb.
"Farsnyus"un bir xəbərində oxuyuruq: "Sinqapurda nəşr olunmuş dünya xəritələrində "Fars körfəzi" adı qeyd olunmayıb. Halbuki həmin nəşriyyatın əvvəlki bütün xəritələrində bu ad yazılmışdı. Bölgənin varlı dövlətləri Sinqapur kimi kasıb dövlətlərin mövcud maddi durumundan yararlanaraq, ona pul xərcləyir və xəritələrə əl gəzdirirlər".
Xəbərdə "Farsnyus" Qərb ölkələrini ittiham etsə də, Azərbaycan türkcəsində olan İran saytlarının yaydığı bu məlumat isə "Ərəb Əmirlikləri "Fars körfəzi" adı ilə müharibə aparır" kimi yayılıb. Körfəzin ərəb ölkələrinə görə, bura "Ərəb körfəzi", fars şovinistlərinə görə, "Fars körfəzi", ruslar üçün "Persidskiy zaliv", biz türklər üçünsə hələ Səlcuq İmperiyası dövründən "Gəngər körfəzi"dir.
|
