Müslüm Maqomayevin qəbirüstü abidəsi hazırdır. Opera və estrada mahnılarının mahir ifaçısı kimi tanınan bu dünya şöhrətli sənətçinin qəbirüstü abidəsinin hazırlanması Azərbaycanın xalq rəssamı, heykəltəraş Ömər Eldarova həvalə edilmişdi.
Heykəltəraşın izahatına görə, abidə mərmərdən yonulub. Burada 20 tonluq materialdan istifadə olunub və bu mərmər Uraldan gətirilib. Abidə üzərində altı ay iş gedib. Mərmər üzərində Müslüm Maqomayevin hamıya tanış olan səhnə obrazı canlandırılmışdır.
Ömər Eldarovun bildirdiyinə görə, açılışdan əvvəl Müslüm Maqomayevin doğmaları abidə ilə tanış olublar. Fəxri Xiyabanda keçirilən açılış mərasimindən sonra Park İNN-də sənətkarın anım mərasimi keçirilib. Tədbirdə dövlət və mədəniyyət xadimləri, sənətkarın həyat yoldaşı Tamara Sinyavskaya, qızı Marina, Rusiyanın tanınmış mədəniyyət işçiləri iştirak ediblər.
Müslüm Maqomayev ötən il oktyabrın 25-də vəfat etdi. Bu həftəsonu Moskvada bu böyük insanın anım günü ilə bağlı tədbirlər nəzərdə tutulur.
|
