Akademik Milli Dram Teatrı 137-ci mövsümündə bir sıra yeni tamaşalar hazırlayır. Teatrın mətbuat əlaqələndiricisinin məlumatına görə, hazırda məşhur "detektiv kraliçası" Aqata Kristinin "Tələ" əsərinin üzərində məşqlər başa çatmaq üzrədir və noyabr ayında tamaşanın təqdimatı keçiriləcək. Tamaşada xalq artistləri Zərnigar Ağakişiyeva, Ramiz Məlik, Rafiq Əzimov, əməkdar artistlər Sənubər İsgəndərova, Elxan Quliyev, Abbas Qəhrəmanov, artistlər Vəfa Rzayeva, Mətləb Abdullayev və başqaları oynayacaqlar. Səhnə əsərinin quruluşçu rejissoru əməkdar incəsənət xadimi Əsgər Əsgərovdur.
Əsərin qısa məzmunu haqqında danışan mətbuat katibi bildirib ki, hadisələr Şotlandiyanın ucqar dağ pansionatında cərəyan edir:
"Burada bir-birinin ardınca müəmmalı qətllər baş verir. Qarlı havada ətrafın dünya ilə bütün əlaqələri kəsilib, yollar bağlanıb. Deməli, qatil pansionatda istirahət edənlərdən biridir. "Detektiv kraliçası" özünəməxsus bir üslubda tamaşaçıların qarşısında maraqlı tapmacalar qoyur, ancaq həmişə olduğu kimi tapmacanın açması hamı üçün gözlənilməz olur". Teatr truppasının hazırladığı növbəti səhnə əsəri qırğız yazıçısı və dramaturqu Çingiz Aytmatovun "Çingiz xanın ağ buludu" əsəridir. Əsərdə böyük sərkərdənin həyatında baş verən tarixi hadisələrdən bəhs edilir. Baş rollarda xalq artistləri Ramiz Novruz, İlham Əsgərov, əməkdar artistlər Əli Nur, Elxan Quliyev və başqaları çıxış edəcəklər. Tamaşanın quruluşçu rejissoru Rövşən Almuradlıdır.
Eyni zamanda, fransız yazıçısı Jan Anuyun əsərlərindən biri teatrda səhnələşdirilir. Onun qədim yunan dramaturqu Sofoklun "Antiqona" faciəsi əsasında eyniadlı müasir yozumu dünya teatrlarının bir çox səhnələrində öz uğurlu həllini tapmaqdadır. Hazırda milli teatrın baş rejissoru, xalq artisti Mərahim Fərzəlibəyov tamaşaçıları məzmunlu və mənalı əsərlə tanış etmək niyyətindədir. Xatırladaq ki, oynanılacaq tamaşada xalq artisti Səyavuş Aslan, əməkdar artistlər Münəvvər Əliyeva, Əsgər Məmmədoğlu, aktyorlar Aslan Şirinov, Əminə Babayeva rol alıblar.
Bundan başqa, balaca tamaşaçılar üçün Xanım Həsənovanın "Tülkü, tülkü, tünbəki..." pyesi üzərində yaradıcılıq işləri başlayıb. Teatr kollektivi əmindir ki, milli nağıl qəhrəmanlarını cəmləyən bu gülüş dolu və eyni zamanda ibrətamiz əhvalat həm uşaqlar, həm də valideynlər üçün yaddaqalan teatr tamaşasına çevriləcək.
Məlumatda qeyd olunur ki, milli teatrla "Yuğ" teatrı arasında olan birgə layihənin quruluşçu rejissoru "Yuğ" teatrının bədii rəhbəri, rejissor Vaqif İbrahimoğludur. Tamaşa bu ilin sonunda təqdim olunacaq.
Teatrdan söz düşmüşkən, sənət ocağının binasında ötən ildən başlayan yenidənqurma və təmir işləri davam edir. Teatrın direktoru Maqbet Bünyadov bildirib ki, ötən ilin noyabrından bu tarixə qədər aparılan təmir işləri zamanı binanın 5 min kvadratmetrlik fasadına üzlük vurulub. Eyni zamanda teatrın dam örtüyü dəyişdirilib və binaya yaxın ərazidə ayrıca bir bina inşa edilib. Öyrəndik ki, təmir başa çatandan sonra təsərrüfat əhəmiyyətli bütün otaqlar həmin korpusa köçürüləcək. Teatr direktoru vurğulayıb ki, təmir işləri zamanı teatr binasının əvvəlki memarlıq üslubunun qorunub-saxlanmasına xüsusi diqqət yetirilir. Milli Dram Teatrının binası dövlət başçısının müvafiq sərəncamına uyğun olaraq təmir olunur.
|
