Azərbaycan Dövlət Filarmoniyasında Bakı Beynəlxalq Caz Festivalının təntənəli açılış mərasimi keçirilib. Mərasimdə çıxış edən mədəniyyət və turizm naziri Əbülfəs Qarayev bildirib ki, "Bakı - islam mədəniyyətinin paytaxtı-2009" ili çərçivəsində keçirilən tədbirlərin sırasında beynəlxalq caz festivalı da yer almalı idi:
"Müəyyən səbəblərə görə bu festival keçən il baş tutmadı. Bu il də baş tutmasaydı, yaranmış bu ənənə pozula bilərdi. Məhz bu səbəbdən dövlət kifayət qədər vəsait ayırdı və Azərbaycan bu məsuliyyətli işi bir daha öz üzərinə götürdü". Nazirin çıxışından sonra, əməkdar incəsənət xadimi, dirijor Fəxrəddin Kərimovun rəhbərliyi ilə Üzeyir Hacıbəyli adına Azərbaycan Dövlət Simfonik Orkestrinin konserti ilə davam edib. Daha sonra xalq artisti Şükür Məmmədov, gənc pianoçu, cazmen Emil Əfrasiyaboğlunun çıxışları təqdim edilib. Xatırladaq ki, Mədəniyyət və Turizm Nazirliyinin təşkilatçılığı ilə keçirilən Beynəlxalq Caz Festivalı oktyabrın 27-dək davam edəcək. Festival çərçivəsində ötən gün Bakı Caz Mərkəzində Montrö Caz Festivalında birincilik qazanan azərbaycanlı cazmen İsfar Sarabskinin (fortepiano) konserti keçirilib. Onunla birgə səhnəni Aleksandr Zinger (zərb) və Ruslan Hüseynov (bass) paylaşıblar. Festivala ABŞ-dan "Richard Bona" və "Branford Marsalis" qrupları, Avstriyadan "Zihan & Kamien" dueti, Portuqaliyadan Cazzinho və İsraildən "Nard Yazz Knights" qrupları, Bakı Beynəlxalq Muğam Festivalının iştirakçıları olan hindistanlı Vasumati Badrinathan və amerikalı Amir Elsaffar dəvət olunublar.
Festivalın açılışı zamanı öyrəndik ki, Beynəlxalq Caz Festivalı gələn ildən etibarən dünyanın ən məşhur caz festivalı olan Montrö festivalının filialı kimi keçiriləcək. Mətbuat işçilərinə bu barədə ətraflı danışan nazir Əbülfəs Qarayev bildirib ki, artıq bununla bağlı Montrö festivalının təşkilatçıları ilə danışıqlar aparılıb:
"Bu festivalın beynəlxalq əhəmiyyəti böyüyür. Gələn il Bakıda daha möhtəşəm caz festivalı keçiriləcək. Beynəlxalq Caz Festivalının gələn ildən etibarən Montrö Festivalının filialı kimi keçirilməsinin böyük marağa səbəb olacağına inanıram".
|
