Azərbaycan Milli Elmlər Akademiyası (AMEA) Hüseyn Cavidin ev muzeyində ənənəvi olaraq oktyabr ayı "Cavidlər ayı" kimi qeyd edildiyi üçün 24-31 oktyabr tarixlərdə muzeydə dahi Azəraycan filosofu, dramaturqu, şairi və maarifçisi Hüseyn Cavidin xatirəsinə həsr olunmuş silsilə tədbirlər keçiriləcək.
AMEA mətbuat xidmətinin xəbərində bildirilir ki, oktyabrın 31-dən noyabrın 8-dək isə Hüseyn Cavidin ev muzeyi əməkdaşları İstanbula - onun gənclik illərində təhsil aldığı şəhərə gedəcəklər. Bəlli olduğu kimi, həmin əsnada İstanbulda 28-ci Beynəlxalq kitab sərgisi keçiriləcək. Sərgidə Hüseyn Cavid və Ərtoğrul Cavidin əsərlərinin təqdimat mərasimi keçiriləcək, tədbir iştirakçılarına həmin əsərlər hədiyyə olunacaq. Mətbuat əlaqələndircisi sözünün davamında qeyd edib ki, oktyabr Cavidlər üçün çox əlamətdar aydır. Çünki şairin özü 1882-ci il 24 oktyabr, oğlu Ərtoğrul 1919-cu il 22 oktyabr, qızı Turan 1923-cü il 2 oktyabr tarixlərində anadan olublar. 1996-cı ilin 29 oktyabrında isə Naxçıvanda Hüseyn Cavid məqbərəsinin açılışı günləridir.
|
