"Türkiyə cəmiyyəti, müxalifət partiyaları və deputatların böyük hissəsi bu protokollara dəstək vermir və buna görə də intensiv əməkdaşlıqla bu problemi birdəfəlik aradan qaldıra bilərik". Bu sözləri dünən Milli QHT-lər Forumunun (MQF) təşəbbüsü ilə keçirilən "Türkiyə ilə Ermənistan arasında imzalanmış sazişlərə etiraz" adlı "dəyirmi masa"da MQF başçısı Rauf Zeyni səsləndirib.
Protokollara münasibət bildirən Rauf Zeyni hər iki dövlət arasında oktyabrın 10-da Sürixdə imzalanmış protokolların bölgəyə sülh və asayiş gətirməyəcəyini ifadə edərək, növbəti mərhələdə Türkiyə parlamentinin protokolları ratifikasiya etməyəcəyinə inam bildirdiyini də vurğuladı. "Dəyirmi masa"da iştirak edən natiqlər Qarabağ problemi həll olunmadıqca sərhədlərin açılmayacağı ilə bağlı rəsmi Ankaranın vədlərinə güvəndiklərini dilə gətirdilər.
"Bəzi beynəxalq güclər iki qardaş dövlətin əlaqələrinə ləkə vurmaq siyasəti yürüdür və protokolların imzalanması da həmin siyasətin tərkib hissəsidir", - deyə "Azəri-Türk" Qadınlar Birliyinin sədri Tənzilə Rüstəmxanlı qeyd edib. Tədbirdə çıxış edən Qadın Hüquqlarını Müdafiə Cəmiyyətinin sədri Novella Cəfəroğlu bu protokolların imzalanmasını beynəlxalq təzyiqin nəticəsi sayaraq, beynəlxalq birliyi Qarabağ probleminin həlli üçün Ermənistana da belə təzyiq göstərməyə çağırıb. "Bəziləri bu protokolların imzalanmasından istifadə edərək, Azərbaycanı Türkiyə ilə əlaqələri kəsməyə çağırıb. Bu çağırışlara ən sərt təpki göstərilməlidir. Bizim qardaş Türkiyəyə iradlarımız "uman yerdən küsərlər" iradıdır", - deyə hüquq müdafiəçisi Səidə Qocamanlı münasibətini ifadə etməklə yanaşı, QAT-ın Türkiyə səfirliyi önündəki aksiyasında Türkiyə rəhbərlərinin şəkillərinin yandırılmasını kəskin surətdə pisləyib.
"Dəyirmi masa" iştirakçılarının fikrincə, Türkiyənin Ermənistanla sərhədləri bağlamasından ötən 16 il ərzində Qarabağ probleminin həlli sahəsində irəliləyiş olmaması da adıçəkilən protokolların imzalanma səbəbləri sırasındadır. Yekun olaraq, iştirakçılar Türkiyə ictimaiyyətinə müraciət ünvanladı. Sənəddə iki dövlət arasında qardaş və dost əlaqələrinin mövcudluğu önə çəkilməklə yanaşı, bütün mümkün vasitələrlə oktyabrın 21-də Türkiyə parlamentində adıçəkilən protokolların ratifikasiyasını önləmək xahiş olunur.
|
