Əməkdar artist Dövlət Akademik Opera və Balet Teatrının solisti Fidan Hacıyeva bu günlərdə Türkiyə səfərini başa vurub və vətənə qayıdıb. Səfər təəssüratlarını mətbuatla bölüşən Fidan Hacıyeva bu çərçivədə ilk çıxışının Mersində olduğunu bildirib. Onun yerli musiqiçilərlə birgə təqdim etdiyi konsert TÜRKSOY Opera Günləri ilə bağlı olub:
"Mersindəki çıxışım zamanı tamaşaçıların mənə isti münasibəti və yaxın ünsiyyəti onların mənim sənətim haqqında müəyyən bilgiyə sahib olduqlarından xəbər verirdi. Konsertdən sonra bizim bir çox musiqiçilərlə, özəlliklə opera ifaçıları ilə söhbətlərimiz oldu. Həmin ərəfədə bir-birimizdən öyrəndiklərimiz də olub".
Sənətçi xanımın sözlərinə görə, Mersin səfərindən sonra opera ifaçıları eyni konsert proqramı ilə Kiprdə çıxış ediblər. Kipr konsertində TÜRKSOY baş direktoru Düsen Kaseinov da vardı:
"Həmin müddətdə bizim birgə görüşümüz keçirildi. Görüş zamanı Düsen Kaseinov konsert barədə müsbət fikirdə olduğunu söylədi. Qeyd edim ki, həmin konsert Bələdiyyə Antik Teatrında açıq havada keçirildi. Musiqili tədbirdə eyni zamanda Qırğızıstan, Qazaxıstan teatrlarının direktorları iştirak edirdi. Onların hər biri ifamızı çox bəyəndiklərini vurğuladılar. Səfər zamanı bir çox konsert agentləri ilə tanış oldum və onların bir sıra təkliflərini gözdən keçirdim. Növbəti gün İstanbul şəhərinə səfərimiz oldu və İstanbul Opera Orkestrinin müşayiəti ilə Antik Teatrda konsert proqramı ilə çıxış etdik. Səfərim ümumilikdə 15 gün davam etdi".
Opera ifaçısının dediyinə görə, səfər zamanı bir çox dinləyici ondan Üzeyir Hacıbəyovun "Sevgili canan" romansını ifa etməsini xahiş edib və sənətçi onların bu istəyini gözəl ifa ilə qarşılayıb.
Təkliflərdən danışan Fidan Hacıyeva bildirdi ki, bunu Türkiyənin opera teatrlarının birindən alıb. Teatrın məsullarından biri azərbaycanlı ifaçıya "Karmen" tamaşasında baş rolun ifasını təklif edib. Bu barədə hələ düşünmə mövqeyində olan Fidan xanım ilin sonuna kimi üzərində çalışdığı beş operanı təhvil verəcəyini xatırlatdı.
İlk milli fotoarxiv yaradıldıAzərbaycanda milli fotoarxiv fondu yaradılıb. Fotoqraflar Birliyi nəzdində fəaliyyətə başlayan arxivdə bütün sahələr üzrə fotomateriallar yığılacaq.
