Azərbaycanın xalq artisti Alim Qasımov və Fərqanə Qasımova Misir səfərinə hazırlaşırlar. Artıq bir aya yaxındır xanəndə Misirdə təqdim edəcəkləri konsertin repertuarı üzərində çalışır. Xanəndənin bildirdiyinə görə, onun repertuarının əsas hissəsini təşkil edən xalq mahnıları, təsnif və şikəstələr bu dəfə yeni aranjimanda təqdim ediləcək: "Səfəri Səudiyyə Ərəbistanında fəaliyyət göstərən yerli musiqi fondları təşkil edib. İdeya bundan ibarətdir ki, bir sıra Şərq ölkələrinin musiqiçiləri bir səhnəni bölüşsünlər. Bu səbəbdən də biz xalq musiqi incilərimizi yeni tərzdə işləyirik. Təşkilat komitəsi ilə danışıqlardan belə aydın olub ki, bizimlə səhnədə digər Şərq ölkələrinin musiqiçiləri ud, dəf, saksafon, ney və bir sıra alətlərdə çıxış edəcəklər. Həmin qrupa daha çox Özbəkistandan olan musiqiçilər daxildir".
Alim Qasımovun əlavəsinə görə, yaxın həftələrin birinə nəzərdə tutulan səfər uzunmüddətli olacaq. Belə ki, xanəndə Səudiyyə Ərəbistanını turne şəklində dolaşacaq. O özü ilə birlikdə tar və kamança ifaçıları, eyni zamanda, xalq çalğı alətləri ansamblını da aparacaq.
|
