"Azərbaycanda gənc ailələrə yalnız valideynləri kömək edir. Dövlət isə gənc ailələrə yardımdan kənarda qalır". Bu fikrin müəllifi millət vəkili Elmira Axundovanın sözlərinə görə, gənc ailələrin sosial müdafiəsini gücləndirmək üçün müvafiq qanun qəbul edilməlidir. Konkret desək, "Milli Məclisdə "Gənc ailələrin sosial müdafiəsi haqqında" qanun layihəci qəbul edilməlidir.
MM sosial siyasət daimi komitəsinin üzvü Elmira Axundova deyir ki, xarici ölkələrdə gənc ailələrin və hamilə qadınların sosial müdafiəsi bizim ölkədən çox-çox yüksəkdir: "Dövlət bu statusda olan insanlara yardım məqsədilə müvafiq addımlar atmalıdır. Bu addımlar isə qanunla tənzimlənməlidir. Gənc ailələrə ögey münasibət neft və qaz ölkəsi olan Azərbaycana yaraşmır. Dövlət gənc ailələrin sosial müdafiəsində iştirak etmir.
Elmira Axundovaya görə, söhbət yalnız maddi göməkdən deyil, eyni zamanda ordu sıralarına çağırışdan, gənclərin işə götürülməsindən gedir: "Hesab edirəm ki, gənc ailələrə sosial dəstək məsələsi proqram şəklində də qəbul edilə bilər".
Məlumat üçün: 2008-2009-cu illərdə bir sıra MDB dövlətlərində dünya maliyyə böhranı və inflyasiyanı nəzərə alaraq, sosial müavinətləri kəskin şəkildə artırıblar. Hamiləliyə, doğuşa və uşağa qulluq etməyə görə müavinətlər xeyli yüksəldilib. Millət vəkili təəssüflə qeyd etdi ki, Ukrayna və Qazaxıstan hamilə qadınların və anaların sosial müdafiəsi baxımından bizdən irəli gediblər. Onlarda bu kateqoriyadan olan insanların sosial müdafiəsi daha güclüdür.
Millət vəkilinin bildirdiyinə görə, Azərbaycanda doğumla əlaqədar birdəfəlik müavinət cəmi 50 manatdırsa, Rusiyada bu məbləğ 350 dollara bərabərdir. Ukraynada birinci uşağın doğuşuna görə birdəfəlik müavinət 150 dollardır. İkinci doğuşda bu məbləğ iki dəfə artır, üçüncü uşaqda isə dövlət ailəyə 600 dollar ayırır. Qazaxıstanda işləməyən qadınlar uşağa qulluğa görə bir il müddətində aylıq müavinət alırlar. İşləyən qadınlar isə orta aylıq əməkhaqqının 40 faizini bir il müddətinə əldə edirlər. Azərbaycanda isə qadın yalnız bir neçə ay uşağa qulluğa görə pul alır, sonra isə öz hesabına məzuniyyətə çıxmalıdır...
|
