Dünən "Reportyorların Azadlıq və Təhlükəsizlik İnstitutu"nun (RATİ) mətbuat mərkəzində "Milli yol" qəzetinin və "Poliqon" İnformasiya Agentliyi (ria.az) baş redaktorunun müavini Ravil Məmmədovun həbsi, baş redaktor Şahin Ağabəylinin həbsinin şahidi olmuş RATİ əməkdaşlarının polisin fiziki təzyiqinə məruz qalması, videokamera və fotoaparatların zorla əllərindən alınması ilə bağlı mətbuat konfransı olmuşdur.
Konfransda çıxış edən "Ayna" və "Zerkalo" qəzetlərinin müxbiri və RATİ-nin əməkdaşı İdrak Abbasov bildirib ki, srağagün "Milli yol" qəzetinin baş redaktoru Şahin Ağabəyli saat 16.00-da RATİ-nin "Qaynar xətti"nə zəng edərək, müavini Ravil Məmmədovun həbsi barədə məlumat verib. Bu zaman MTN əməkdaşı olduqlarını deyən, lakin sənəd təqdim etməyən 5 nəfər idmançı görkəmli şəxs Ravilin axtarışda olduğunu deyərək, onu zorla maşına oturdaraq naməlum istiqamətə aparıblar.
RATİ Ravil Məmmədovla bağlı məlumat verilməsi ilə əlaqədar MTN və DİN-ə təcili informasiya sorğuları göndərib və telefon əlaqəsi saxlayıb.
Məsələ ilə əlaqədar DİN mətbuat xidmətinin əməkdaşı Ehsan Zahidov bu barədə heç bir məlumata malik olmadıqlarını deyib.
MTN İctimaiyyətlə Əlaqələr Mərkəzinin rəisi Arif Babayev isə RATİ-nin sorğusuna cəmi 15 dəqiqədən sonra cavab olaraq bildirib ki, MTN belə bir əməliyyat keçirməyib və Ravil Məmmədov adlı şəxs MTN əməkdaşları tərəfindən saxlanmayıb.
Bundan sonra Şahin Ağabəyli RATİ-yə məlumat verib ki, Ravil Məmmədov dostuna zəng edərək bildirib ki, Daxili İşlər Nazirliyində saxlanılır. Ravil Məmmədov vurğulayıb ki, 5 oktyabr tarixində "pia.az" saytında "DİN-də ixtisarlar olacaq" yazısına görə sorğu-sual edilir.
Daha sonra İ.Abbasov bildirib ki, dünən saat 19.00 radələrində Ş.Ağabəyli "Milli yol" qəzetinin və "Poliqon" İnformasiya Agentliyinin Rəsul Rza və Bəşir Səfəroğlu küçələrinin kəsişməsində yerləşən ofisinin mülki geyimli polis əməkdaşları tərəfindən mühasirəyə alındığını bildirib.
Saat 19.30-da özü və RATİ-nin əməkdaşı Qəmbər Qəmbərov Şahin Ağabəyli ilə mülki geyimli şəxslərin birinin söhbətini lentə alarkən, mülki geyimli şəxslər qəflətən hücum edərək, Şahin Ağabəylini həbs edib, həmçinin RATİ əməkdaşlarının qollarını buraraq, çəkiliş avadanlıqlarını zorla əllərindən alıblar. Bundan başqa, binanın bayır hissəsində çəkiliş aparan digər RATİ əməkdaşı Elnur Məmmədovu da zorla avtomobilə basaraq, əlindəki videokameranı müsadirə edib və onu Ş.Ağabəyli ilə eyni maşında aparıblar.
RATİ əməkdaşı Elnur Məmmədov yolda maşından düşürülərək sərbəst buraxılsa da, avadanlıqlar geri qaytarılmayıb
Saat 22.00-da Şahin Ağabəyli və müavini Ravil Məmmədov, eləcə də "pia.az" saytının əməkdaşı Eldəniz Elgün sərbəst buraxılıblar. Onlar həmçinin özləri ilə RATİ-nin müsadirə olunmuş avadanlıqlarını öz ofislərinə gətirərək, RATİ əməkdaşlarına təhvil veriblər. Amma fotoaparatdakı çəkiliş pozulub, vidokasetlər isə müsadirə edilərək, əvəzinə kameralara təzə kasetlər qoyulub.
Şahin Ağabəyli qeyd edib ki, DİN mətbuat xidmətinin rəhbəri Sadiq Gözəlovla əlaqədən sonra qərargaha gələn Mütəşəkkil Cinayətkarlığa Qarşı Mübarizə İdarəsinin əməkdaşları tərəfindən idarəyə aparılıb.
İdarənin rəisi ilə görüş olub və saytda gedən yazılarla bağlı fikir mübadiləsi aparılıb. Bir saatlıq söhbətdən sonra sərbəst buraxılıblar. Baş redaktor başına gələn hadisələrin yenidən təkrarlanacağını qeyd edərək, həmkarlarından müdafiəsində köməklik xahiş edib.
RATİ rəhbəri Emin Hüseynov DİN-lə məhkəmə çəkişmələrinin başlanacağını deyir. Onlar jurnalistlərin peşə fəaliyyətinə müdaxilə və vəzifə səlahiyyətlərini aşma maddələri ilə tezliklə məhkəməyə müraciət edəcəklər. E.Hüseynov bununla bağlı sona qədər mübarizə aparacaqlarını söyləyib.
|
