Quba Olimpiya Mərkəzində jurnalistlər üçün təşkil olunmuş düşərgədə KİV mənsubları bir arada idi. Təşəbbüs AR Gənclər Təşkilatlarının Milli Şurasından gəlmişdi. Məqsəd isə jurnalistlərlə sıx əməkdaşlıqda işləmək idi.
Düşərgədə həm Bakıdan, həm də Qubanın özündən jurnalistlər iştirak edirdi. Onlarla görüşə müxtəlif peşə sahibləri dəvət olunmuşdular. Tədbirin təşkilatçısı, AR Gənclər Təşkilatlarının Milli Şurasının sədri, deputat Fuad Muradov beş gün ərzində jurnalistlərin yanında oldu. Həm seminar, həm də istirahət vaxtını jurnalistlərin yanında keçirən millət vəkili onlarla bir çox məsələləri müzakirə etdi. Fuad Muradov bildirdi ki, bu düşərgə jurnalistikaya dəstək məqsədilə gerçəkləşdirilib. O dedi ki, ölkənin hər sahədə əldə etdiyi uğurların cəmiyyətə çatdırılmasında problemlər var.
Diskussiyalarda Cahangir Məmmədli, Rəşad Məcid, Nuşirəvan Məhərrəmli, Vüsalə Mahirqızı, Akif Aşırlı, Ələsgər Məmmədli kimi media aləmində yaxşı tanınan, çox vaxt jurnalistika sahəsində ekspert kimi rəyləri öyrənilən isimlər iştirak edirdilər. Biz jurnalistlərdən "ələkeçməz" titulu almış insanlara da bu düşərgədə rast gəlmək olardı. Məsələn, bu yaxınlarda Dağlıq Qarabağa səfər etmiş deputat, Milli Məclisin hüquq siyasəti və dövlət quruculuğu komitəsinin sədr müavini Rövşən Rzayevin bir gününü jurnalistlərlə keçirməsi media mənsubları üçün əsl tapıntı oldu.
Bu beş gündə müxtəlif problemlərə toxunuldu. Adətən jurnalistlər çox sərbəst və səmimi olduqlarından çox maraqlı diskussiyalar açıldı. Bəlkə də səhvlərini etiraf edən yeganə peşə sahibləri olan bizlər həm öz yanlışlıqlarımızdan, həm də bizə qarşı olan haqsızlıqlardan danışdıq. Hətta bəzi problemlərin həll yolları barədə təkliflər də səsləndirildi. Mətbuatın ağır iqtisadi vəziyyətindən tutmuş, jurnalistlərin peşəkarlıqla bağlı problemlərini aradan qaldırmaq üçün bir sıra birgə layihələri gerçəkləşdirmək qərara alındı. İştirakçılardan bu kimi arzular da səsləndirildi: qoy mətbuat o qədər inkişaf etsin ki, jurnalistlər öz mənzil problemlərinin həlli üçün KİV-ə dəstək fonduna göz dikməsinlər. Elə gün olsun ki, rəsmi şəxslər, biznes adamları jurnalistlərə sərbəst müsahibə verməkdən çəkinməsinlər.
İstirahətə gəlincə, ilk dəfəydi qələm sahibləri deputatlara və redaktorlara öz güclərini qəzet səhifələrində yox, futbol və voleybol meydançalarında da göstərdilər. Hər kəs yorulanda "mübarizəsini" masaüstü oyun variantlarına keçirirdi.
Düşərgənin son günü jurnalistlər Qubadakı soyqırım məzarlığını ziyarət etdilər. Onlara məzarlığın mühafizəsi ilə bağlı indiyədək görülən işlər barədə bilgi verildi. Düşərgə iştirakçıları burada inşa ediləcək abidə kompleksinin layihəsi ilə tanış oldular.
Qeyd edək ki, Gənclər Təşkilatları Milli Şurası gələn il gənc jurnalistlərlə bağlı yeni layihə planlaşdırır. Bu layihə çərçivəsində bir qrup KİV əməkdaşının Strasburqa səfəri təşkil olunacaq.
|
