Kişinyovda MDB-yə üzv ölkələrin dövlət və hökumət başçılarının sammiti artıq başa çatıb. APA-nın məlumatına görə, sammitə Moldova prezidentinin səlahiyyətlərini icra edən parlament spikeri Mixay Qimpu sədrlik edib. Zirvə toplantısına Azərbaycan, Ermənistan, Belarus, Qırğızıstan, Rusiya və Ukraynanın prezidentləri, Qazaxıstan və Tacikistan baş nazirləri, Türkmənistan baş nazirinin müavini, Özbəkistan parlamentinin sədri və MDB-nin icra katibi Sergey Lebedev qatılıblar.
3 saat davam edən sammitdə dövlət başçıları gündəliyə daxil edilən 16 məsələni müzakirə ediblər. Müzakirə olunan sənədlər arasında 2009-2010-cu illərdə ümumdünya maliyyə-iqtisadi böhranının nəticələrinin aradan qaldırılması üçün birgə təşəbbüslər haqqında qərar layihəsi də var. Layihə baxılmaq üçün MDB Hökumət Başçıları Şurasının toplantısına tövsiyə olunub. Qərar layihəsində MDB üzvü dövlətlərin hökumətlərinə qarşılıqlı ticarətin liberallaşması istiqamətində tədbirlər görmək, malların MDB ölkələrinin daxili bazarlarına daxil olmasını əngəlləyəcək proteksionist tədbirlər görməkdən çəkinmək tövsiyə olunur.
Bundan başqa toplantıda aşağıdakı sənədlər müzakirə olunub:
- Böyük Vətən Müharibəsində Qələbənin 65-ci ildönümü münasibətilə MDB dövlət başçılarının MDB dövlətlərinin xalqlarına və beynəlxalq ictimaiyyətə müraciəti;
- MDB məkanında 2010-cu ilin Böyük Vətən Müharibəsi Veteranları İli elan olunması haqqında qərar;
- MDB-yə üzv ölkələrin veteran təşkilatları haqqında qərar;
- MDB ölkələrinin razılaşdırılmış sərhəd siyasəti Konsepsiyasının reallaşması çərçivəsində sərhəd təhlükəsizliyinin möhkəmləndirilməsinə yönəlik tədbirlər haqqında qərar;
- MDB dövlətlərinin narkotik maddələrin, psixotrop dərmanların və prekursorların qanunsuz dövriyyəsinə nəzarət edən rəhbər orqanlarının Şurasının yaradılması haqqında saziş;
- MDB ölkələrinin müvafiq orqanlarının əməkdaşlığı haqqında ümumi müddəalar barədə qərar.
2010-cu ildə MDB-yə sədrlik Moldovadan Rusiyaya keçəcək. Rusiya prezidenti MDB dövlət başçılarını gələn ilin mayında Böyük Vətən Müharibəsində Qələbənin 65-ci illiyi münasibətilə keçiriləcək bayram tədbirləri çərçivəsində qeyri-formal görüşə dəvət edib. MDB dövlət başçılarının növbəti sammiti gələn ilin dekabrında Moskvada keçiriləcək. Sammitin gedişini şərh edən MDB-nin icra katibi Sergey Lebedev toplantının konstruktiv keçdiyini bildirib.
|
