Ailə qurmaq istəyirdi, adam öldürdü

Şirvan şəhərində qız qaçırdıb, evlənmək istəyən bir gənc adam öldürüb. Marif İmran oğlu Balayev ona qız qaçırmaqda kömək etmiş şəxsin atasını qətlə yetirib. Onun öz evində...

Şirvan şəhər Prokurorluğu Marif Balayevi CM 120.2.4-cü (xüsusi amansızlıqla və ya ümümi təhlükəli üsulla adam öldürmə) maddəsi ilə ittiham edərək, cinayət işini baxılmaq üçün Ağır Cinayətlərə Dair İşlər üzrə Məhkəməyə göndərib. İşə hakim Rauf Əliyevin sədrliyi ilə baxılmışdır.

İttihamdan məlum olub ki, Şirvan sakini, 1942-ci il doğumlu Əliyev İmran Abdulla oğlunu öz evində Marif Balayev İmran oğlu tərəfindən bıçaqlanaraq qətlə yetirilib. Prokuror cinayətin xüsusi amansızlıqla baş verdiyini bildirib. Məhkəmə prosesində ifadə verən Marif Balayev elan edilmiş ittiham üzrə özünü təqsirli bilsə də, hadisənin xüsusi amansızlıqla törədildiyini təsdiqləməyib. Bildirib ki, "mərhumu öldürmək niyyəti olmayıb".

Təqsirləndirilən şəxsin məhkəmə ifadəsindən: "Mən Şirvan şəhərində qız qaçırmışdım. Həmin qızı qaçırmaqda mərhumun oğlu Bəxtiyar mənə köməklik etmişdi. Məni ailəm qəbul etmirdi. Buna görə də Bəxtiyardan bizə kirayə ev tapmasını xahiş etdim. Mən hadisə baş verən gün Bəxtiyargilə gəldim. Həmin vaxt məni onun atası qarşıladı və məni söyməyə başladı. Mən də bu söyüşlərdən əsəbiləşdim və onu bıçaqla vurdum".

Məhkəmə bütün tərəfləri dinlədikdən sonra hökm elan edib. Məhkəmənin hökmü ilə Marif Balayev 13 il müddətinə azadlıqdan məhrum edilib.