Bu gün Bakı İdman Sarayında cüdo üzrə dünya kuboku yarışı başlanır. Beynəlxalq turnirdə Azərbaycan cüdoçularından başqa Rusiya, Polşa, Hollandiya, Türkiyə, Portuqaliya, Gürcüstan, Yunanıstan, Norveç, İsrail, Fransa, Yaponiya və Belarus idmançıları da mübarizə aparacaqlar. Aldığımız son məlumata görə, Ukrayna öz idmançılarını bu yarışa göndərməyib. Belə ki, Ukrayna tərəfi Bakı turnirində iştirak etməyə razılıq versə də, hazırlıq proqramında edilən dəyişikliyə görə turnirə gəlməyib.
Cüdo üzrə yığma komandamızın baş məşqçisi Ağayar Axundzadə dünya kubokunda çıxış edəcək heyəti açıqlayıb. Federasiyadan verilən məlumata görə, hər çəki dərəcəsində Azərbaycandan dörd cüdoçu mübarizə aparacaq. Ağayar Axundzadə bu yarışlarda daha çox gənc cüdoçuları sınaqdan çıxaracaq. Tanınmış idmançılardan isə Sərxan Əhmədov (66 kq), Amil Qasımov (73 kq), Elxan Rəcəbli (81 kq) və Elxan Məmmədov (90 kq) çıxış edəcəklər.
Yığmanın baş məşqçisi dünya kuboku yarışlarında yaxşı nəticə göstərməyin vacib olduğunu qeyd edib. O, "azerisrort.com" saytına açıqlamasında belə deyib: "Dünya kuboku yarışlarının yekunlarına görə, idmançılara lisenziya xalları veriləcək. Komandamız əsasən gənc idmançılardan təşkil olunub. Çünki yığmanın bəzi üzvləri zədəlidir. Bir tərəfdən də bir neçə gündən sonra Fransada gənclər arasında dünya çempionatı başlayır. Biz həmin yarışda daha güclü heyətlə çıxış etmək istəyirik".
Yeri gəlmişkən, əfsanəvi yapon cüdoçusu, dünya çempionu, üçqat olimpiya çempionu Tadaxiro Nomura da Bakıdadır. Bakı turniri 2008-ci il aprel ayından beynəlxalq yarışlarda iştirak etməyən məşhur idmançı üçün qayıdış olacaq. 35 yaşlı cüdoçu il yarımlıq fasilədən sonra yenidən böyük idmana qayıdır və 2012-ci il London Olimpiadasında iştirak etmək istəyir.
|
