Cənubi Afrika Respublikasında futbol üzrə 2010-cu il dünya çempionatının seçmə mərhələsi sona yaxınlaşır. Bu gün və gələn həftənin çərşənbə günü keçirilən oyunlarla Avropa zonası üzrə seçmə mərhələyə yekun vurulacaq. Bununla da dünya çempionatına vəsiqə qazanan altı qrup qalibinin və vəsiqə uğrunda mübarizəni pley-off matçlarında davam etdirəcək komandaların adlarına tam aydınlıq gələcək.
Xatırladaq ki, Hollandiya, İspaniya və İngiltərə dünya çempionatının finalında çıxış etmək hüququnu təmin ediblər. Seçmə mərhələnin başa çatmasına iki tur qalmış Danimarka, İsveçrə, Almaniya, Slovakiya, İtaliya və Serbiya finala vəsiqə qazanmağa çox yaxındır.
Maraqlı oyunlardan biri Moskvada Rusiya və Almaniya arasında baş tutacaq. Qonaqlar qələbə qazandıqları təqdirdə qrup qalibi kimi dünya çempionatının finalına vəsiqə qazanacaqlar. Danimarka və İtaliya yığmaları da eyni şansdan istifadə etməyə çalışacaqlar. Türkiyə yığmasının taleyi də yaxın günlərdə bəlli olacaq. Bu gün Belçika, 4 gün sonra Ermənistanla oyunlardan sonra Türkiyənin CAR-a gedib-getməyəcəyi müəyyənləşəcək.
Xatırladaq ki, seçmə mərhələdə qruplarda ikinci yeri tutan 8 komanda pley-off mərhələsində mübarizəni davam etdirəcək. Pley-off mərhələsinin qalibi olan 4 kollektiv finala vəsiqə qazanmış 9 qrup qalibinə qoşulacaq. Pley-off matçları noyabrın 14-də və 18-də keçiriləcək. Bu mərhələ üçün püşkatma oktyabrın 19-da Sürixdə təşkil olunacaq.
Milli komandamız bu gün Lixtenşteyn yığmasının qonağı olacaq. Bakı vaxtı ilə 23.00-da Vaduts şəhərinin "Reynpark" stadionunda keçiriləcək görüşün baş hakimi çernoqoriyalı Pavle Radovanoviçdir. Bu seçmə mərhələsində Lixtenşteynlə ilk oyun 2008-ci il sentyabrın 10-da Bakıda keçirilib və heç-heçə qeydə alınıb - 0:0.
Berti Foqtsun başçılıq etdiyi yığmamız bu seçmə mərhələdə keçirdiyi 8 oyunun 7-də məğlub olub. Futbolçularımız yeganə xalı Bakıda elə Lixtenşteynlə oyunda qazanıblar. İndi hesabında vur-tut 1 xal olan yığmamız qrup sonuncusudur. Komandamızın çıxış etdiyi qrupda Almaniya 22 xalla birincidir. İkinci pillədə qərarlaşan Rusiya yığmasının 21 xalı var. Finlandiya 14 xalla üçüncü, Uels yığması isə 9 xalla dördüncü pillədə qərarlaşıb. Son turda Finlandiya ilə matçda heç-heçə oynayan Lixtenşteyn sonuncu pilləni Azərbaycana təhvil verib. Odur ki, Lixtenşteynlə bugünkü görüş sonuncu pillədən qopmaq və ilk qələbəni qazanmaq üçün bəlkə də yeganə şansdır.
Baş məşqçi Berti Foqts görüşdən əvvəl mətbuat konfransı keçirib və oyunla bağlı fikirlərini səsləndirib: "Görüşün favoriti Lixtenşteyndir, çünki onlar ev sahibi qismində çıxış edəcəklər. Nəticə bizim üçün önəmlidir. Bura qələbə qazanmağa gəlmişik, əgər imkan versəniz".
Lixtenşteyn yığmasının baş məşqçisi Hans Peter Zauq isə iddialı danışıb: "Azərbaycanla matçda ən vacib olan özünəinamdır. Elə biz də heç nədən qorxmuruq və gücümüzə əminik. Azərbaycanla oyundan xalsız ayrılmağı heç ağlımıza da gətirmirik. Aparıcı oyunçular olmasa belə, bu heç nə demək deyil. Heyətə düşənlər daha əzmlə və həvəslə mübarizə aparacaq. Çünki belə də olmalıdır".
Bu gün seçmə oyunlar çərçivəsində aşağıdakı görüşlər keçiriləcək: Finlandiya - Uels, Rusiya - Almaniya, Belarus - Qazaxıstan, Ukrayna - İngiltərə, Lüksemburq - İsveçrə, Estoniya - Bosniya-Hersoqovina, Ermənistan - İspaniya, Çernoqoriya - Gürcüstan, Kipr - Bolqarıstan, Danimarka - İsveç, İsrail - Moldova, Yunanıstan - Latviya, Çexiya - Polşa, Slovakiya - Sloveniya, Avstriya - Litva, Serbiya - Rumıniya, Portuqaliya - Macarıstan, Belçika - Türkiyə, Fransa - Farer adaları, İrlandiya - İtaliya.
|
