Qışın düşməsinə az qalıb. Amma orta məktəblərin əksəriyyəti texniki və təchizat baxımından mövsümə hazır deyil. Bəzilərində vəziyyət 10-15 il əvvəlki kimidir. Özəlliklə kənd məktəblərində istilik sistemi, kanalizasiya, su təchizatı, elektrik enerjisinin verilişi, kommunal infrastruktur yarıtmaz haldadır. İş o yerə çatıb ki, ombudsman Elmira Süleymanova təhsil naziri Misir Mərdanova müraciət edərək şagirdlərin qışda istiliklə təmin olunmasını xahiş edib.
Ombudsman Aparatının işçiləri yeni dərs ili ərəfəsində monitorinq keçirib. Qəza vəziyyətində olan məktəblərin həddən artıq çox olması aşkara çıxıb. Elə kənd məktəbi var ki, aşağı sinif şagirdləri qış aylarında istilik sisteminin yoxluğu ucbatından dərsə gəlmir. Yaxud valideynlər hər gün məktəbə odun parçası gətirməklə istilik problemini həll etməyə məcburdur. Odun tapılmayan məktəblər də var. Hətta bir çox kəndlərdə qaz olsa da, məktəblərə qaz xətti çəkilməsinə yerli təhsil şöbələri icazə vermir.
Elmira Süleymanova hesab edir ki, belə vəziyyətdə həmin məktəblərdə dərs keçmək düzgün deyil. Bu məktəblərdə təhsil alan şagirdlər qonşuluqdakı təhsil müəssisələrinə köçürülməlidir.
Ombudusman məktəblərlə yanaşı, uşaq bağçalarının vəziyyətindən də narahatdır. Son illərdə bağçalara diqqət göstərilmir. Kommunal xidmət və uşaqların istirahəti aşağı səviyyədədir. Bakı şəhərinin mərkəzi rayonlarındakı bağçalarda belə istilik təminatı həll olunmayıb. Qızdırıcı peçlərin istifadəsini qadağan edən rəhbərlik bu problemi elektrik qızdırıcıları ilə həll etməyə çalışır.
Mövcud problemi Təhsil Nazirliyi də təsdiq edir. Bildirilir ki, ölkədə 600 məktəb dərslərin keçirilməsi üçün yararlı vəziyyətdə deyil. TN növbəti illərdə təhsil sahəsinə ayrılan investisiyanın artırılacağına və problemin bir neçə il ərzində tamamilə aradan qalxacağına ümid edir.
|
