"Qiyas Sadıxov Xalq Partiyasının sədr əvəzi vəzifəsini yerinə yetirir və bu partiyanı biz bir yerdə yaratmışıq. Onun millət vəkilinin köməkçisi olması, əslində, formaldır". Bunu APA-ya açıqlamasında millət vəkili Pənah Hüseyn deyib.
Ümid Partiyasının sədri İqbal Ağazadənin "Xalq Partiyasının sədri deputat köməkçisidir və bu, real müxalifətdir, amma bu qədər strukturu, proseslərdə bu qədər mövqeyi olan Ümid Partiyası müxalifət deyil?" fikrinə münasibət bildirən P.Hüseyn bildirib ki, Q.Sadıxov vaxtilə Prezident Aparatı İşlər İdarəsinin müdiri, ondan əvvəl isə AXC Məclisinin üzvü olub: "Qiyas bəy müəyyən müddət işsiz idi. Ona görə də deputat köməkçisi ştatı açılandan sonra xahiş etdim ki, bu vəzifəni tutsun. Bu məsələnin parlamentin üzvü olan İqbal bəy tərəfindən səsləndirilməsi, ola bilsin, onun əsəbi vəziyyətdə olması ilə bağlıdır. Çünki İqbal bəylə münasibətlərimiz təkcə siyasi çərçivədə deyil. Amma bir məsələni demək istəyirəm ki, deputat köməkçisi olmaq iqtidar köməkçisi olmaqdan heç də pis deyil. Mən bu sözü heç də İqbal bəyə ünvanlamıram. Amma ümumilikdə deyirəm ki, bu məsələlər barədə danışarkən ehtiyatlı olmaq lazımdır".
Pənah Hüseyn bildirib ki, 2005-ci il parlament seçkilərində ümumilikdə Ümid Partiyasının topladığı səslərdən çox səs alıbsa, bu onu göstərir ki, təkcə Pənah Hüseynin siyasi proseslərə təsiri ümumilikdə Ümid Partiyasının təsirindən az deyil: "Hesab edirəm ki, hansı vəziyyətdə olmasından asılı olmayaraq indiki şəraitdə digər partiyalarla bağlı siyasi etikaya və ədəbə riayət edərək danışmaq lazımdır. Mən hörmətli İqbal bəyin AXP və onun sədr əvəzi vəzifəsini icra edən şəxs haqqında danışdıqlarına təəssüf edirəm".
|
