İrandan Azərbaycana qaçaqmalçılıq yolu ilə uyuşdurucu gətirməkdə ittiham olunan İran vətəndaşı, 1955-ci il doğumlu Sanael Mahmud Hamid oğlunun məhkəməsi başa çatıb. Ağır Cinayətlərə Dair İşlər üzrə Məhkəmədə hakim Ənvər Seyidovun sədrliyi ilə keçirilən iclasda Sanael Mahmuda 12 il iş kəsildi.
Təqsirləndirilən şəxs CM 206.2-ci (qaçaqmalçılıq), 234.4.3-cü (külli miqdarda narkotik vasitələr, psixotrop maddələr və ya prekursorları hazırlama, istehsal etmə, əldə etmə, saxlama, daşıma, göndərmə və ya satma) maddələri ilə təqsirli bilinib. İttihama əsasən Sanael Mahmud Hamid oğlu Əzizbəyov rayon Polis Şöbəsi narkotiklərlə mübarizə bölməsinin əməkdaşları tərəfindən tutulub. Onun idarə etdiyi avtobusu saxlayan əməliyyatçılar maşına baxış keçiriblər və avtobusdan 14 kiloqram 110 qram narkotik vasitə olan həşiş aşkar edərək götürüblər. Ağır Cinayətlərə Dair İşlər üzrə Məhkəmədə İrandan Azərbaycana qaçaqmalçılıq yolu ilə silah və narkotik vasitələr gətirməkdə ittiham olunan şəxslərin məhkəməsi başlayıb. İran vətəndaşları - Səməndəri Həmid Məhər oğlu, Rzayi Mirzabil Mirzəyar oğlu, Xurşudov Mirzabil Mirzəyar oğlu, Mirhəzərov Mirhani Mircəfər oğlu CM 228.201-ci (qabaqcadan əlbir olan bir qrup şəxs tərəfindən odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə), 206.3.2-ci (qabaqcadan əlbir olan bir qrup şəxs tərəfindən qaçaqmalçılıq), 234.4.1 və 234.4.3-cü (qabaqcadan əlbir olan bir qrup şəxs tərəfindən və ya mütəşəkkil dəstə tərəfindən külli miqdarda narkotik vasitələri, psixotrop maddələri və ya prekursorları hazırlama, istehsal etmə, əldə etmə, saxlama, daşıma, göndərmə və ya satma) maddələri ilə ittiham olunurlar.
İttihama görə, təqsirləndirilən şəxslər bu il yanvarın 25-də Biləsuvar rayonu ərazisində Dövlət Sərhəd Xidmətinin əməkdaşları tərəfindən tutulublar. Onlardan 10 kq həşiş, 2 kq 901 qram heroin, TT markalı tapança götürülüb.
|
