Növbəti dəfə start götürən "Yeni ulduz" yarışmasının münsiflər heyətində kiçik dəyişiklik edilib. Əvvəlcə Mübariz Tağıyev, Ruhəngiz Qasımova, Oqtay Əliyev və Aygün Kazımova ilə təmsil olunan münsifləri sonuncu müğənni tərk etmək məcburiyyətində qalıb.
Həftənin 5 günü ATV telekanalında "Xeyir ola" verilişinə aparıcılıq edən, eyni zamanda, sıx yaradıcılıq işlərinin olduğunu diqqətə çatdıran Aygün xanım boş qalan yerinə onun yaxın dostu və həmkarı Zülfiyyə Xanbabayevanı məsləhət görüb. Oktyabrın ilk günlərində müsabiqənin qeydiyyat mərhələsi başa çatandan sonra Zülfiyyə xanım digər münsif həmkarları ilə birlikdə dinləmələrdə iştirak edəcək.
Vaxtının buna imkan verdiyini bildirən Zülfiyyə xanım gənclərin düzgün seçimində öz iştirakını da vacib hesab edir:
"Bildiyiniz kimi, mən peşəkar səhnəyə "Bakı payızı" müsabiqəsinin qalibi kimi gəlmişəm. O vaxt səs imkanlarımı eşidən münsiflər heyəti mənim birinci olduğum qənaətinə gəldilər. İndi isə mən gənclərin düzgün seçimində yaxından iştirak etmək istəyirəm. Eyni zamanda, münsiflər kürsüsündə Mübariz müəllim, Ruhəngiz xanım və təcrübəli Oqtay müəllimin olması, mənim bu təklifi qəbul etməyimdə tərəddüd hissləri yaşatmadı".
Müsabiqədə istedadlı iştirakçıların olacağına ümid edən Zülfiyyə xanım çağdaş Azərbaycan estradasının gələcəyinin onlara etibar edildiyini bildirdi: "Son illər estrada sənəti haqqında fərqli fikirlər səslənməkdədir. Bir çoxları sənətin inkişaf mərhələsini aşmadığını, bəziləri yad elementlərə məruz qaldığını iddia edir. Biz bu cür halların baş verməməsi səbəbindən buradayıq. Onlara düzgün oxumağı aşılamaqla yanaşı, düzgün seçim etməyi öyrətməliyik".
Sonda yaradıcılığından söz salan Zülfiyyə xanım barəsində bir müddət əvvəl danışdığı yeni mahnılarının hazırlıq prosesini keçdiyini söylədi. Müğənni bildirdi ki, tezliklə repertuarında bir sıra dəyişiklik olacaq. Zülfiyyə xanım "Yeni ulduz"dakı iştirakının yaradıcılığına ciddi təsir göstərməyəcəyini də qeyd etdi.
|
