Əməkdar artist Gülyaz Məmmədova 3 yaşlı Fərid Abbasbəyli ilə birlikdə "Apar məni" adlı mahnını duet şəklində ifa edib. Duetə rejissor Kənan M.M ekran həyatı verib. Hər iki yaradıcılıq işinə təqdimat keçirən Gülyaz xanım bunun zəruri olduğunu bildirib: "Uşaqlara kiçik yaşlarından dəstək olmaq lazımdır ki, onlar peşə seçimində yanılmasınlar. Fəridin 3 yaşı olmasına baxmayaraq artıq onda istedadın qığılcımları hiss olunur. Mən onun səsini ilk dəfə eşidəndə, düşündüm ki, bunu böyük kütlənin qarşısında sərgiləmək lazımdır. Uşaqla bir neçə dəfə görüşüb onunla məşq etdim. Onunla hər görüşümdə irəliləyiş olduğunu hiss edirdim. Sonrakı günlərdə belə qərara gəldik ki, Fəridlə bir duet səsləndirim. İlkin mərhələdə seçimimiz yeni bəstələr üzərində oldu. 3 yaşlı uşaq yeni bəstəni çox asanlıqla qavrayıb, ifa etdi. Onu lentə yazdırandan sonra, klip çəkdirməyi də düşündük. Çünki onun səsini eşidən tamaşaçı mütləq özünü də görmək istəyəcək. Bir müddət əvvəl Kənan M.M duetə ekran həyatı verdi. Sonra bu qənaətə gəldik və Fəridlə olan yaradıcılıq işimi öncə KİV-in mühakiməsinə verim. Zalda oturan insanlar hazır ideyanı çox bəyəndilər və dəstəklədilər".
Gülyaz xanımın bildirdiyinə görə, bu gün azyaşlı uşaqlar arasında oxumağa meyilli olanlar çoxdur. Lakin onların çox azında istedad görmək mümkündür: "Yaşından asılı olmayaraq, hər ifaçıda səslə yanaşı, musiqini duymaq, ritmi tutmaq və notdan kənar oxumamaq bacarığı olmalıdır. Bu tələblər olan yerdə ifaçı böyük səhnələrə doğru addımlaya bilir. Əks təqdirdə, bir-iki mahnıdan sonra "ulduzu sönür". Mənim duet ortağım olan Fərid istedadlıdır. Lakin o daim nəzarətdə olmalı, məktəb yolu keçməlidir".
|
