Aktyor və rejissor, xalq artisti Ramiz Əzizbəyli yataq xəstəsidir. Bu barədə Show.az-a rejissorun özü danışıb:
"Aprelin 8-də bağırsaq xəstəliyindən cərrahiyyə əməliyyatı keçirmişəm. Bundan sonra özümü çox yaxşı hiss edirdim. Sağalmağa doğru özümü bərk soyuğa verdim. Elə o gündən yataqdayam. İndi də onurğamdakı problemdən əziyyət çəkirəm. Uzun müddətdir nə yeyir, nə də otura bilirəm. Xəstə olan gündən evdə müalicə kursu keçirəm".
Ramiz Əzizbəyli gileyli danışmağı sevməsə də, ona qarşı olan soyuq münasibət aktyoru danışmağa vadar edib. O bildirib ki, sənət adamlarından heç kim onun səhhəti ilə maraqlanmır:
"Bəzi insanlar xəstəliyini reklama çıxarmağı sevir. Lakin mən təbiətimə yad addımlar atmaq istəmirəm. Ümduğum insanların heç birinə zəng vurub, ehtiyacımı bildirməmişəm. Onlar mənim başı aşağı olduğumu bilib, sakit oturublar".
Aktyorun xüsusi gileyi isə Mədəniyyət və Turizm Nazirliyinin ünvanına olub. O bildirib ki, xəstə olduğu müddətdə sözügedən qurumun hansısa nümayəndəsi, eyni zamanda nazir özü onun səhhəti ilə maraqlanmayıb:
"Görünür, mən xəstə vaxtımda onlara lazım deyiləm. Bu günə kimi Azərbaycan mədəniyyəti üçün nə etmişəmsə, halal xoşları olsun".
|
