Uzun illərdir Türkiyədə çalışan nəfəsli alətlər ifaçısı Əlixan Səmədov yazdığı bəstələrdən birini həmyerlisinə təqdim etmək fikrinə düşüb. Onun seçimi Türkiyəyə sıx səfərlər edən Nadir Qafarzadə olub.
Nadir Qafarzadənin prodüserinin açıqlamasına görə, Əlixan Səmədovun diqqətinə layiq olan Nadir Qafarzadə onun mahnısına tezliklə nəfəs vermək istəyir. Bu məqsədlə də vaxtının əsas hissəsini yeni bəstənin hazırlıqlarına ayırıb.
Prodüserinin əlavəsinə görə, əslində Nadir Qafarzadə Əlixan Səmədova belə bir istəkdə olduğunu bildirməyib. Yəni Nadir Qafarzadənin onun mahnısını oxumaq ideyası məhz balaban ifaçısına məxsusdur.
Söhbətdən bəlli oldu ki, azərbaycanlı musiqiçi mahnını Türkiyə türkcəsində yazıb. "Nərdə kaldın" adlanın bəstəni Nadir Qafarzadə "Harda qaldın" adı ilə əvəzləyib və mahnının sözlərini də ana dilimizdə təqdim etməyə qərarlıdır. Əməkdaşlığın ilk mərhələsində Əlixan Səmədovla telefon bağlantısı yaradan Nadir Qafarzadə mahnı hazır olandan sonra onu Azərbaycana dəvət etdiyini bildirib. Yaradıcılıq işini böyük kütlənin qarşısında sərgiləməyi düşünən Nadir Qafarzadə tezliklə ona çəkiləcək klipin təqdimatını keçirməyi düşünür.
