Azərbaycanın Hərbi Doktrinası bu ilin sonu, gələn ilin əvvəlinə hazır olacaq. Bunu prezidentin müdafiə məsələləri üzrə köməkçisi, general-leytenant Vahid Əliyev bildirib. Onun sözlərinə görə, artıq sənəd üzərində işlər yekunlaşmaq üzrədir. Sənədin məxfi olmayan hissələrini ictimaiyyətin müzakirəsinə çıxarmaq da var.
"Sənəddə təhlükəsizlik və müdafiə nöqteyi-nəzərindən Azərbaycanın qarşısında duran vəzifələr əksini tapacaq. Həmçinin müvafiq qurumların üzərlərinə düşən vəzifələrin icrası da orada göstəriləcək", - deyə Vahid Əliyev bəyan edib.
General onu da vurğulayıb ki, Hərbi Doktrinada Azərbaycanın həm quru, həm də dəniz təhlükəsizliyi ilə bağlı vacib məqamlar yer alacaq.
Vahid Əliyev bildirir ki, Azərbaycan prezidenti yanında Silahlı Qüvvələr Baş İnspeksiyasının yaradılması istiqamətində işlər davam etdirilir. Onun sözlərinə görə, inspeksiyanın yaradılması yaxın gələcək üçün perspektiv plana daxil edilib: "Silahlı Qüvvələrin inkişafı ilə bağlı planlarımız var. Bu işlər tədricən icra olunacaq", - deyə general qeyd edib.
|
