Tovuzun Yanıqlı kəndində dəhşətli qətl hadisəsi törədən Arif Babayevin məhkəməsi başa çatıb. Proses Ağır Cinayətlərə Dair İşlər üzrə Məhkəmədə hakim Rasim Sadıqovun sədrliyi ilə gedirdi.
... Tovuz rayonunun Yanıqlı kənd sakini, 43 yaşlı Yaşar Cəfərovun meyiti Zəyəm çayının sahilində yandırılmış vəziyyətdə aşkarlanıb. Hüquq-mühafizə orqanlarının keçirdiyi əməliyyat tədbiri nəticəsində qətlin Şəmkir rayonunun Tatar kənd sakini, 33 yaşlı Arif Babayev tərəfindən törədildiyi aşkarlanıb və həmin şəxs polis əməkdaşları tərəfindən yaxalanıb.
Müəyyən edilib ki, Arif Babayev Yaşar Cəfərovun boğazını bıçaqla kəsdikdən sonra onun maşınında əyləşən qadını zorlayıb. Sonradan qadın cinayətkarın əlindən qaçıb qurtulsa da, bu hal Arif Babayevi bərk qəzəbləndirib və o, meyiti yandırmaq qərarına gəlib.
Təqsirləndirilən şəxs Arif Babayev bildirdi ki, Yaşar Cəfərov yanındakı qadınla maşında əxlaqsız hərəkət etdiklərindən, onlara yaxınlaşıb və ərazidən uzaqlaşmalarını tələb edib. Bu zaman aralarında mübahisə yaranıb və nəticədə Arif Yaşarın boğazını kəsib. Amma kəndinin təəssübünü çəkən Arif Babayev sonra özü maşındakı qadınla əylənmək həvəsinə düşüb. O, meyiti yandırmasını isə belə izah etdi: "Mən onu apardım çayın qırağına. Əsmər düşdü maşından, dedi ki, burada əlimin palçığını, qanını yuyub gəlirəm. Mən də maşını çəkdim qırağa, yəni meyiti odlamaq fikri ilə aparmırdım ora. Əsmər qaçanda mən də hirslənib ölünü yandırdım".
Arif Babayev bir neçə maddə ilə təqsirli bilindi, 15 il müddətinə azadlıqdan məhrum edildi.
|
